Eýropadaǵy qaýipsizdik jáne yntymaqtastyq uiymynyń Demokratiialyq institýttar jáne adam quqyqtary jónindegi biýrosy QR Parlamenti Májilisi men máslihattary depýtattaryn sailaýǵa baiqaýshylaryn akkreditteý týraly ótinish bergen joq. Bul týraly QR Ortalyq sailaý komissiiasynyń múshesi Anastasiia Shegortsova aitty, dep habarlaidy QazAqparat.
«Ortalyq sailaý komissiiasy baiqaýshylar institýtyn ashqanyn bilesizder. Syrtqy ister ministrligi arqyly yntymaqtastyq jolǵa qoiylǵan barlyq halyqaralyq uiymǵa, onyń ishinde EQYU-ǵa da usynys jiberilgen bolatyn Búgingi kúni atalǵan uiymnan akkreditteýge ótinim kelip túsken joq. Degenmen, ýaqyt bar, kútemiz», - dedi ol QR OSK otyrysynan keiin uiymdastyrylǵan baspasóz máslihaty barysynda.
Aita keterligi, búgin ol komissiia otyrysynda 10 sheteldik baiqaýshyny akkreditteý týraly qaýly jobasyn tanystyrǵan bolatyn.
«2020 jylǵy 25 jáne 26 qarashada Syrtqy ister ministrliginiń 10 baiqaýshyny akkreditteý týraly usynystary kelip tústi. Olardyń barlyǵy akkreditteýge shyǵarylyp otyr. Usynylǵan tizimde 6 baiqaýshy TMD baiqaýshylary missiiasynyń quramynda, 4 baiqaýshy Islam Yntymaqtastyq Uiymy missiiasynan akkreditteledi», - degen edi A.Shegortsova.
Jalpy osy ýaqytqa deiin QR OSK Táýelsiz Memleketter Dostastyǵyna qatysýshy memleketterdiń Parlamentaralyq Assambleiasynan 29 baiqaýshyny akkredittedi.
