Májilis depýtatary Erkebulan Mámbetov pen Dmitrii Koloda Soltústik Qazaqstan oblysynyń Petropavl qalasyna bardy. Onda Manash Qozybaev atyndaǵy Soltústik Qazaqstan memlekettik ýniversitetindegi jataqhana máselesin talqylady.
1200 orynǵa arnalǵan eki stýdenttik jataqhana Petropavl qalasynyń ortalyǵynda 500 metr qashyqtyqta ornalasady.
Qurylys belsendi qarqynmen júrip jatyr, qazir nysanda 90 adam jumys isteidi, merdiger jergilikti «Osnovanie» JShS. Merdigerdiń aitýynsha, jataqhana 2024 jyldyń tamyzyna deiin daiyn bolady. Qurylystyń alty aiǵa keshiktirilýiniń sebebi – tenderdiń basqa qatysýshysynyń daýlasýyna bailanysty sot protsesi ótken. Sondai-aq, jaqyn mańdaǵy jeke úilerdi buzý múmkindiginiń bolmaýyna bailanysty jylý jelisi jataqhanalarǵa ýaqytynda jetkizilmeýi múmkin. Jylý júrgizilgennen keiin ǵana qurylysshylar ishki árleýge kirise alady.
– Jylý men sý bolmasa, obekt iske qosylmaidy. Biz Petropavl ákimdiginen jaqyn jerde ornalasqan úsh úidi satyp alý kerek degen mardymsyz jaýap aldyq. Eger qarasha-jeltoqsan ailarynda infraqurylym jasalmasa, onda merdigerdiń paidalanýǵa berilýi áli belgisiz ýaqytqa keshiktiriledi. Ol qysta ishki jumystardy júrgize almaidy, – dedi Erkebulan Mámbetov.
Jospar boiynsha eki jataqhanadaǵy úi-jailardyń jalpy aýdany 27 myń sharshy metrden asady. Munda ákimshilik úi-jailar, sport zaldary, býfetter men meditsinalyq bloktar ornalasady. Ár bólimde as úi, kir jýý, tazalaý jáne keptirý bólmesi, turmystyq, jattyǵý jáne demalys, qosalqy bólmeler men jýynatyn bólmeler bolady.
«AMANAT» partiiasynyń aqparaty boiynsha
