Parlament Májilisiniń jalpy otyrysynda depýtat Azamat Ábildaev qarjylyq qiyndyqqa tap bolǵan adamdarǵa nesie raqymshylyǵyn jasaýdy usyndy, dep habarlaidy QazAqparat.
«Qazaqstan halqynyń bankter aldyndaǵy bereshegi kún sanap artyp bara jatyr. Qazirgi ýaqytta, halyqtyń 27 paiyzy bankterdiń aldynda boryshker. Búginde el turǵyndarynyń ipotekalyq nesie boiynsha bereshegi 2,716 trln teńgege jetipti. Tutynýshylyq maqsattarǵa alynǵan nesie 5,19 trln teńge bolsa, merzimi ótken bereshek 199 mlrd teńgeni qurap otyr», - dedi Ábildaev Úkimet basshysynyń birinshi orynbasary Álihan Smaiylovtyń atyna joldaǵan saýalynda.
Osy oraida ol elimizde zańdy tulǵalardyń bankrottyǵy týraly zańy bar ekenin, biraq jeke tulǵalardyń bankrottyǵy týraly zań joq ekenin atap ótti. «Aq jol» partiiasynyń depýtattary buǵan deiin de «Jeke tulǵalardyń bankrottyǵy týraly» zań jobasy kerek dep júrgenine on shaqty jyl boldy. Bul bastamany sol kezde Qarjy ministrligi ilip áketkenimen, osy kúnge deiin únsiz qalyp otyr.
«Al endi qylmys jasap sottalǵandarǵa raqymshylyq jasap otyrǵan memleketke qandai da bir oqys oqiǵaǵa ushyraýynyń saldarynan qarjylyq qiyndyqqa tirelip otyrǵan azamattarymyzǵa nege qamqorlyq jasamasqa?! Olar da bizdiń qoǵamymyzdyń bir bólshegi emes pe? Nege olarǵa da raqymshylyq jasamaimyz?», - dedi depýtat.
«Aq jol» partiiasynyń depýtattary qandai da bir oqys oqiǵaǵa ushyraýynyń saldarynan qarjylyq qiyndyqqa tirelip otyrǵan azamattarymyzǵa Táýelsizdiktiń 30 jyldyǵyna bailanysty raqymshylyq jasaýdy, Parlamenttiń qaraýyna «Jeke tulǵalardyń bankrottyǵy týraly» zań jobasyn engizýdi, kollektorlyq kompaniialardy tizgindeýdi suraimyz», - dedi Azamat Ábildaev.
