Qostanai oblysyna jumys saparmen kelgen Qazaqstan Respýblikasy Parlamenti Májilisiniń depýtattary Áýliekól aýdanyna baryp, birqatar áleýmettik nysandy aralady, - dep habarlaidy QazAqparat.
Halyq qalaýlylary Áýliekól aýdanynyń aktivimen kezdesti. Turǵyndar túitkildi máselelerin aityp, usynystaryn bildirdi. Máselen, aýdan turǵyny Faina Mihailovna saýda-sattyq nysandaryna birneshe jyl boiy gaz qubyrynyń júrgizilmegenin aitty. Ol 40 saýda uiymynyń ókili qol qoiǵan usynys hatty depýtattarǵa usyndy.
Depýtat Qýanysh Sultanovtyń aitýynsha, mundai máseleler ár óńirde bar. Sol sebepti QR Prezidenti Qasym-Jomart Toqaevtyń tapsyrmasy boiynsha, depýtattar eldi mekenderdi aralap, turǵyndardyń máselelerin sheshýge atsalysýda.
Áýliekól bastaýysh mektep-internatynyń ujymymen áńgime barysynda depýtattar «Pedagog mártebesi týraly» Zańnyń qabyldanýyna bailanysty ózgeristerdi túsindirip berdi.
«Jańa zań pedagogtardyń kásibi qyzmettegi quqyqtary men mindetterin egjei-tegjeili kórsetedi jáne materialdyq jaǵynan qamtamasyz etedi. Buǵan qosa áleýmettik kepildikterge qatysty normalardy qamtidy. Halyqaralyq olimpiada, túrli baiqaý jáne sport jarystarynyń jeńimpazyn ázirlegen muǵalimdi úsh eńbekaqy mólsherinde syiaqymen marapattaý, aýyldyq jerde turatyn muǵalimderge jer telimin alýda basymdyq berý máselesi qarastyrylǵan», - dedi depýtat Irina Aronova.
«NurOtan» partiiasy fraktsiiasynyń múshesi Albert Raý Krasnooktiabr boksit kenishi basqarmasynyń avtokólik tsehi ujymymen kezdesti.
Lisakov qalasynyń janynda ornalasqan Krasnooktiabr boksit kenishi basqarmasy – TMD elderindegi boksit óndirý boiynsha taý-ken kásiporyndarynyń arasyndaǵy eń aýqymdysy. Ken ornynyń qory 120 mln tonnany quraidy. Kásiporyn qazaqstandyq tústi metallýrgiianyń flagmany sanalatyn «Qazaqstan Aliýminiii» AQ úshin negizgi shikizat jetkizýshisi sanalady.
Tsehta májilismender Memleket basshysy Qasym-Jomart Toqaevtyń Qazaqstan halqyna Joldaýynyń iske asyrylýy jáne depýtat retinde atqarǵan jumysy jónindesóz qozǵady. Óz kezeginde kásiporyn jumysshylary avtokólik tsehiniń negizgi qyzmeti týraly baiandap berdi.
