Búgin Májilis depýtattary Bas prokýratýrada komitetterdiń kóshpeli otyrysy barysynda qabyldanǵan zańdardyń tájiribiede qalai qoldanatynyn jáne tsifrlyq tehnologiialardyń olardyń tiimdiligin arttyrý jolynda qalai yqpal etetinin baǵalady, dep habarlaidy "Ult aqparat".
Májilistiń Halyqaralyq ister, qorǵanys jáne qaýipsizdik komiteti men Zańnama jáne sot-quqyqtyq reforma komitetiniń depýtattary Bas prokýratýranyń «Ákimshilik óndiristiń biryńǵai tizilimi», «Tekserý sýbektileri jáne obektileriniń biryńǵai tizilimi», «Elektrondyq ótinishter» jáne basqa tsifrlyq jobalary usynyldy.
Is-shara barysynda Bas prokýrordyń orynbasary M.Ahmetjanov quqyq qorǵaý salasyndaǵy tsifrlandyrý jaiyn keńinen baiandady.
Jalpy aitqanda, jobalardy engizý sybailas jemqorlyq táýekelderin joiýǵa, memlekettik organdar qyzmetiniń ashyqtyǵyn, jedeldigin, sondai-aq memlekettik baqylaý men qadaǵalaýdyń sapasyn arttyrýǵa baǵyttalǵan.
Atap aitqanda, «Tekserý sýbektileri jáne obektileriniń biryńǵai tizilimi» júiesin 60-tan astam memlekettik organdar paidalanady. Júie kásipkerlerdi baqylaýshylar tarapynan negizsiz qysymnan qorǵaýdyń negizgi quraldarynyń biri bolyp sanalady.
Dál osy arqyly kásipkerler tekserýshilerdiń áreketteriniń zańdylyǵyn tekserýge múmkindik alady.
Usynylǵan jobalardy baǵalai otyryp, Májilis depýtattary azamattardyń, sondai-aq biznes sýbektileriniń quqyqtary men zańdy múddelerin qorǵaý úshin olardyń mańyzdylyǵyn atap ótti.
- Biz úshin sapaly zańdardy ázirleý men qabyldaý ǵana asa mańyzdy emes. Biz úshin qabyldanǵan zańdardyń qalai jumys isteitini jáne tiimdiligi mańyzdy. Sonymen qatar azamattardy qorǵaý, memlekettik organdardyń kelip túsetin ótinishterin sapaly qaraý, kásipkerlikti damytý máseleleri árdaiym Májilis depýtattarynyń baqylaýynda. Memleket Basshysy buǵan zor kóńil bólip, aldymyzǵa tiisti zańnamalyq mindetterdi júktedi. Osy baǵytta birqatar zańdar qabyldanyp, Májilis depýtattary búginde zańnamany jetildirý jumystaryn jalǵastyrýda, - dedi Májilis tóraǵasynyń orynbasary Pavel Kazantsev.
