Májilis Spikeri Nurlan Nyǵmatýlinniń tóraǵalyǵymen ótken jalpy otyrysta Palata depýtattary birqatar jańa zań jobalaryn maquldady, dep habarlaidy "Ult aqparat" tómengi palatanyń baspasóz qyzmetine silteme jasap.
Atap aitqanda, depýtattar energiia únemdeý jáne energiia tiimdiligin arttyrý máselelerine qatysty zań jobasyn birinshi oqylymda maquldady.
Bul zań jobasynyń negizgi maqsaty - jalpy ishki ónimniń energiia syiymdylyǵyn tómendetý boiynsha energiia únemdeý jáne energiia tiimdiligin arttyrý salasyndaǵy júrgiziletin saiasattyń túpki nátijesine qol jetkizý.
Májilis Tóraǵasy Nurlan Nyǵmatýlin zań jobasy sý paidalanýdy baqylaý júiesin qarastyrýy tiis ekenin atap ótip, jumys tobyna ekinshi oqylymǵa deiin ázirleýshilermen birlesip osy máseleni pysyqtaý qajettigin aitty.
Nurlan Nyǵmatýlinniń pikirinshe, Indýstriia jáne infraqurylymdyq damý ministrligi zań jobasynan tiisti normalardy alyp tastaý usynysy ónerkásiptik kásiporyndardyń, kommertsiialyq jáne biýdjettik uiymdardyń sýdy qalai paidalanatynyn baqylaýǵa múmkindik bermeidi.
Sondyqtan Nurlan Nyǵmatýlin depýtattardyń qoldanystaǵy sý tutynýdy baqylaý júiesin saqtaý qajettiligi týraly túzetýlerin qoldaý kerektigin atap ótti.
Jalpy, zań jobasymen ekspress-energoaýdit jáne maqsatty energoaýdit engiziledi. Nysanǵa barmai aldyn alý baqylaý tártibi bekitiledi. Sonymen qatar, oblystardyń, respýblikalyq mańyzy bar qalalardyń jáne astananyń jergilikti atqarýshy organdarynyń quzyreti energiia únemdeý jónindegi jol kartalaryn ázirleý jáne bekitý jónindegi normamen tolyqtyrylady.
Sondai-aq, depýtattar Qylmystyq kodekske ólim jazasy máseleleri boiynsha ózgerister men tolyqtyrý engizý týraly zań jobasyn birinshi oqylymda maquldady.
Qujat ulttyq zańnamany qabyldanǵan halyqaralyq quqyqtyq mindettemelerge sáikes úndestirýge baǵyttalǵan jáne Hattamany ratifikatsiialaý kezinde kórsetilgen Qazaqstan Respýblikasynyń eskertpesine sáikes soǵys ýaqytynda jasalǵan áskeri sipattaǵy asa aýyr qylmystar jasaǵany úshin kináli dep tanylǵannan keiin ony soǵys ýaqytynda qoldaný jaǵdailaryn qospaǵanda, ólim jazasyn joiýdy kózdeidi.
Sonymen qatar, depýtattar Qazaqstan men Resei arasyndaǵy «Baiqońyr» ǵarysh ailaǵynda «Báiterek» ǵarysh zymyran keshenin qurý týraly kelisimge túzetýler hattamany ratifikatsiialaý týraly zań jobasyn maquldady.
Hattamaǵa sáikes «Báiterek» Qazaqstan-Resei birlesken kásiporny» aktsionerlik qoǵamy biýdjettik kreditti onyń jarǵylyq kapitalyna aiyrbastaý arqyly kredittik mindettemelerden bosatylady jáne óz qyzmetin odan ári júzege asyrýǵa múmkindik alady.
Jalpy otyrys barysynda Palatanyń beiindi komitetteri birqatar jańa zań jobalaryn jumysqa aldy. Olar: geodeziia, kartografiia jáne keńistiktik derekter týraly zań jobasy ilespe túzetýlerimen, sondai-aq, volonterlik qyzmet, qaiyrymdylyq, memlekettik áleýmettik tapsyrys jáne úkimettik emes uiymdarǵa arnalǵan granttar máseleleri boiynsha ózgerister men tolyqtyrýlar engizý týraly jáne Eýraziialyq ekonomikalyq odaqtyń kedendik aýmaǵy arqyly qaýipti qaldyqtardy transshekaralyq ótkizý týraly kelisimdi ratifikatsiialaý týraly zań jobalary bar.
Otyrys sońynda Májilis depýtattary memlekettik organdar basshylaryna depýtattyq saýaldar joldady. Olar: A.Platonov, D.Espaeva, V.Nábiev, D.Myńbai, D.Turganov, A.Jumabaeva, A.Ábildaev, Ǵ.Tashqaraev.
