Májiliste «2004 jylǵy 22 jeltoqsandaǵy Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy «Baiqońyr» ǵarysh ailaǵynda «Báiterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratifikatsiialaý týraly» Zań jobasy maquldandy, dep habarlaidy QazAqparat.
QR Tsifrlyq damý, innovatsiialar jəne aeroǵarysh ónerkəsibi ministri Baǵdat Mýsinniń aitýynsha, atalǵan hattamaǵa 2020 jylǵy 31 qazanda Máskeý qalasynda qol qoiylǵan.
«Hattamanyń negizgi mindeti «Báiterek» jobasynyń negizgi sharttaryn túzetý jáne ózektendirý bolyp tabylady. Bul rette hattama eń aldymen Qazaqstan tarapynyń múddelerine jaýap beredi. Tutastai alǵanda hattama qazaqstandyq tarap úshin qajet, óitkeni bul birinshi kezekte birlesken kásiporynnyń Qazaqstannyń Qarjy ministrligi aldyndaǵy biýdjettik kredit boiynsha qarjylyq mindettemeleri máselesin zańdy negizde sheshýge múmkindik beredi», - dedi Baǵdat Mýsin Májilistiń plnearlyq otyrysynda.
Budan basqa, hattamaǵa Resei tarapynyń 2036 jylǵa deiin «Soiýz-5» zymyran-tasyǵyshtaryn ushyrý keshenin qamtamasyz etý jónindegi mindettemeleri engizilgen.
«Bul jobada Resei tarapy tasymaldaǵysh zymyrandy qurýdy qamtamasyz etedi, al Qazaqstan tarapy qoldanystaǵy «Zenit-M» ǵaryshtyq zymyran kesheniniń jerústi keshenin jańǵyrtýdy qarjylandyrýdy memlekettik tapsyrma arqyly oryndaýdy qamtamasyz etedi. Zań jobasy kúshine engende mynadai nátijelerge qol jetkizýge múmkindik beredi: birinshi, «Báiterek» Qazaqstan-Resei birlesken kásiporny» AQ biýdjettik kreditti onyń jarǵylyq kapitalyna aiyrbastaý arqyly kredittik mindettemelerden bosatylady jáne «Báiterek» memleketaralyq jobasyn iske asyrýdy jalǵastyrýǵa múmkindik alady. Aiyrbastaý rásiminiń nátijesinde Qazaqstandyq taraptyń birlesken kásiporynǵa qatysý úlesi shamamen 99%-ǵa deiin artady. Ekinshi – hattama «Báiterek» ǵaryshtyq ushyrý kesheninen 10 jyl ishinde Resei tarapynan keminde 2 ushyrylym qamtamasyz etetin kepildigin beredi. Bul qurylǵan keshenniń bolashaqta memlekettik investitsiialarynyń qaitýyna múmkindik beredi. Resei tarapymen osy kelisimniń kúshine enýi týraly ishki memlekettik rásimderi oryndaldy», - dedi Mýsin.
