QR Qorǵanys ministrliginde 2020 jyldyń 4 mamyrynda Qazaqstannyń Áskeri-áýe kúshteriniń S-295 ushaǵynda oryn alǵan tosyn oqiǵaǵa qatysty tekserý aiaqtaldy, dep habarlaidy "Ult aqparat" atalǵan vedmostvonyń baspasóz qyzmetine silteme jasap.
Tergeýdi Qorǵanys ministriniń buiryǵymen Airbus Military-ushaqty ázirleýshi kompaniia, sondai-aq «Qazaqstan aviatsiialyq indýstriiasy» JShS ókilderimen birlesip qurylǵan arnaiy komissiia júrgizdi.
«Tekserý qorytyndysy boiynsha komissiia aviatsiialyq oqiǵanyń sebebi shassidiń aldyńǵy tireginiń dońǵalaqtaryn basqarý júiesiniń tehnikalyq aqaýlyǵy boldy», - dedi QR Memlekettik aviatsiiasynyń ushý qaýipsizdigin qadaǵalaý departamentiniń bastyǵy polkovnik Qairat Baimahanov.
Shassidiń aldyńǵy tireginiń shyqpaýyna bailanysty bolǵan shtattan tys jaǵdaida ekipaj aqaýdy joiý úshin qajetti barlyq jaǵdaidy jasady. Áskeri ushqyshtardyń saýatty is-qimyldarynyń arqasynda áýe kemesi Jetigen aerodromyna sátti qona aldy.
Ekipaj quramynda áýe kemesiniń komandiri maior Jeńis Zainýldinov – 1700 saǵattan astam ushýy bar 1-shi synypty ushqysh, kapitannyń kómekshisi Abylai Ibraev, bort-injener maior Kárim Pahirdinov jáne bort-mehanik praporshik Igor Karabets boldy.
QR Prezidenti – Qarýly Kúshterdiń Joǵarǵy Bas qolbasshysy sheshimimen S-295 ushaǵynyń ekipajy memlekettik nagradalarmen marapattaldy. Atap aitqanda maior Jeńis Zainýldinov jáne kapitan Ablai Ibraev – II dárejeli «Aibyn» ordenderimen, maior Kárim Pahirdinov jáne praporshik Igor Karabets – «Jaýyngerlik erligi úshin» medaldarymen.
Sondai-aq, Qarýly Kúshter men Tótenshe jaǵdailar komitetiniń jerdegi qyzmetteriniń kásibi áreketteri atap ótildi. «Jetigen» aerodromyn ushaqtyń avariialyq qonýyn qamtamasyz etýge aldyn ala daiyn bolýy, adam shyǵynynyń aldyn alýǵa jáne qymbat turatyn aviatsiialyq tehnikany saqtaýǵa múmkindik berdi.
Qorǵanys ministriniń buiryǵymen ushaqtyń jerdegi avariialyq qonýyn qamtamasyz etýde kásibilik tanytqan áskeri qyzmetshiler «El qorǵany» medaldarymen jáne Qurmet gramotalarymen marapattaldy.
Eske salsaq, Nur-Sultan-Aqtóbe baǵytyndaǵy áskeri ushaqtyń aldyńǵy shassii ashylmai, Jetigen aerodromyna aman-esen qonǵanyn habarlaǵanbyz.
