19 aqpan kúni elorda turǵyndary men qonaqtarynyń nazaryna Dj.Verdidiń ǵalamat «Don Karlos» operasy usynylady, dep habarlaidy "Ult aqparat".
Alǵash ret patshaiym Elizaveta Valýanyń basty partiiasynda «Astana Opera» sahnasyna teatrdyń jetekshi solisi, Qazaqstannyń eńbek sińirgen ártisi, QR Memlekettik syilyǵynyń laýreaty Maira Muhamedqyzy shyǵady.
«Elizaveta partiiasynda barlyǵy: vokal da, akterlik sheberlik te kúrdeli. Patshaiym bolǵan qandai? Iaǵni, bul symbattylyqty, qimyl-qozǵalystyń airyqsha ikemdiligin, kerbezdigin qajet etedi. Elizaveta jas, aqyldy, óktem jan, kórermen meniń patshaiym ekenime senetindei etip beineni jasaýym kerek. Osy partiiaǵa deiin meniń repertýarymda tek ǵashyq nemese qaza bolatyn qyzdar ǵana boldy. Qazir óz beinemdi izdeýdemin: ol ne týraly oilaitynyn, onyń qandai sezimde bolǵanyn túsingim keledi. Elizaveta – azap shegýshi áiel – Don Karlosty jan-tánimen súiedi, biraq patshanyń aldynda óziniń adaldyǵyn, ar-namysyn saqtaidy. Daiyndyq jasap júrip, men olardyń ómiri qandai qiyn bolǵan dep oilanamyn. Mysaly, búkil álem Filipp patshanyń aiaǵynyń astynda, biraq ony eshkim jaqsy kórmegendikten, ol azap shegedi. Osyndai sátterde men ózimdi baqytty opera ánshisi sanaimyn. Sebebi ártúrli keiipkerlerdiń taǵdyryn bastan ótkizip, qaita ózimniń qalpyma kele alamyn, - dedi Maira Muhamedqyzy.
Bas partiialarda «Astana Operanyń» jetekshi solisteri óner kórsetedi: Filipp II – Armeniianyń Halyq ártisi Barseg Týmanian, Don Karlos – Qazaqstannyń eńbek sińirgen qairatkeri, Italiia Juldyzy Ordeniniń kavaleri Medet Chotabaev, Rodrigo – Qazaqstannyń eńbek sińirgen qairatkeri Talǵat Musabaev jáne teatr solisteri: Uly inkvizitor – Bolat Esimhanov, Hanshaiym Eboli – Tatiana Vitsinskaia, Monah – Shyńǵys Rasylhan, Tebaldo – Mádina Islamova, Aspan daýysy – Elena Ganja, Graf di Lerma – Erulan Kámel, Gerold – Ramzat Balakishiev.
«Astana Opera» simfoniialyq orkestri, hory, baleti, mimans ártisteri, mýzykalyq jetekshi – teatrdyń bas dirijeri, Qazaqstannyń eńbek sińirgen qairatkeri, QR Memlekettik syilyǵynyń laýreaty Alan Bóribaev. Qoiýshy rejisser, stsenograf – opera áleminiń eń bedeldi Opera Star Award 2019 marapatynyń iegeri Davide Livermor. Stsenografiia – Gio Forma stýdiiasy, kostiýmder boiynsha sýretshiler – Qazaqstannyń eńbek sińirgen qairatkerleri Sofia Tasmaǵambetova, Pavel Dragýnov, bas hormeister – Qazaqstannyń eńbek sińirgen qairatkeri Erjan Dáýitov.
Fridrih Shillerdiń attas dramasy boiynsha librettosyn Jozef Meri men Kamil diý Lokl jazǵan. Álemdik premerasy 1867 jyly 11 naýryzda Parijde oryn alǵan, al «Astana Operadaǵy» qoiylym premerasy jetinshi teatr maýsymy aiasynda 2019 jyldyń qazan aiynda orasan zor tabyspen ótti.
