Qazaqstanda «Búkilálemdik duǵa» atty álemdik tanymal týyndyǵa klip túsirildi. Bul týraly Teatrdyń baspasóz qyzmeti habarlady.
«Astana Opera» jetekshi solisi Maira Muhamedqyzy dúniejúzi dárigerlerine arnap «Búkilálemdik duǵany» oryndady.
«Men barlyǵy úshin án salmaimyn, men árbir adam úshin án salamyn. Búginde dárigerler men meditsina qyzmetkerleriniń jankeshtiligi men tabandylyǵyna tórtkúl dúnie qairan qalýda. Búgingi kúnniń batyrlary bul – basqanyń ómiri úshin shybyn janyn shúberekke túiip, kúndiz-túni qyzmet etip júrgen dárigerler. Jer-jerde koronavirýsqa shaldyqqandar sany artýda. Degenmen, jazylyp shyqqandardyń sany da az emes. Árine buǵan aq halatty abzal jandardyń eren eńbeginiń arqasynda qol jetkizip jatyrmyz»- dep atap ótti ataqty ánshi Maira Muhamedqyzy.
Aita ketsek, «Habar» Agenttigi QR Mádeniet jáne sport ministrligi, «Astana Opera» MOBT-men birge dárigerlerge arnap «Búkilálemdik duǵa» atty álemdik tanymal týyndyǵa klip túsirdi. Bul grek kompozitory Vangelistiń klassikalyq shyǵarmasy. Buǵan qosa klipte koronavirýspen kúresip júrgen dúniejúzi dárigerleri týraly kadrlar da qoldanyldy.
