Kóktemde Qaraǵandy qalasyndaǵy kópqabatty úilerdiń birinde kireberiske tastap ketken eki ailyq sábidi jańa otbasy asyrap aldy. Politsiia qyzmetkerleri sábidiń biologiialyq anasyn tappady, dep habarlaidy QazAqparat.
Esterińizge sala keteiik, 3 naýryzda Qaraǵandy qalasyndaǵy Maiqudyqta kópqabatty úidiń kireberisinen turǵyndar tastandy sábidi taýyp alǵan bolatyn.
Bir ereksheligi balaǵa taza jáne qymbat kiim kigizgen. Soǵan qaraǵanda, osy jaitqa deiin ony jaqsy kútkeni baiqalady.
Alaida tártip saqshylary qyzdyń biologiialyq ata-anasyn aqyry tappady.
Birneshe aidan keiin, barlyq tiisti rásimderden keiin balany qaraǵandylyq bir otbasy asyrap aldy.
Alaida, balanyń qujattaryn rásimdeýde belgili bir qiyndyqtar týyndady.
Zańǵa sáikes, eger náresteni kóshede tastap ketken bolsa, onda qamqorshylyq organdary ony bir apta ishinde qujattaý týraly málimdeýi tiis.
Biraq qorǵanshylyq qyzmetkerleri politsiianyń tergeýine bailanysty muny ýaqytynda jasai almaǵan.
«1 shildeden bastap ákimshilik is júrgizý kodeksi kúshine endi jáne biz shaǵym berdik. Biraq bastapqyda sotqa emes, joǵary turǵan mekemege shaǵymdanýymyz kerek edi. Bul jaǵdaida Qazybek bi atyndaǵy aýdan ákimdiginde jazdyq. Biz olarǵa hat jazyp, balany qujattandyrdyq», - dep túsindirdi Qaraǵandy bilim bóliminiń qorǵanshylyq jáne qamqorshylyq bóliminiń meńgerýshisi Ásem Erisheva.
Belgili bolǵandai, bul sábidi kóp otbasylar asyrap alǵysy kelgen.
Barlyq úmitkerlerdi saraptai otyryp, qamqorshylyq organy sábidi jaqsy ata-anaǵa berý týraly sheshim qabyldaǵan.
Endi ol jańa otbasynda turyp jatyr.
