Tórt salmaq divizionynyń burynǵy jeńimpazy, jartylai orta salmaqtaǵy (66,7 kelige deiin) amerikalyq Maiki Garsiia (40-1, 30 KO) boks tarihyndaǵy segiz salmaq divizionyn baǵyndyrǵan jalǵyz jeńimpaz, aty ańyzǵa ainalǵan filippindik Menni Pakiaomen (62-7-2, 39 KO) jekpe-jek ótkizýge keliskenin málimdedi, dep habarlaidy "Ult aqparat" Sports.kz-ke silteme jasap.
Amerikalyqtyń aitýynsha, jekpe-jek mamyr aiynda ótedi. Ol Djo Ankerge bul týraly: «Qazir biz kelisimdi túpkilikti aiaqtaýǵa jaqyn qaldyq. Ótetin kúni men orny týraly aldaǵy eki kúnde sheshemiz dep úmittenemiz. Barlyǵyn mamyr aiynda uiymdastyrýǵa tyrysýdamyz. Biz bul jekpe-jekke jetý úshin uzaq ýaqyt jumys istedik, kelissózder birneshe jyl boiy úzilistermen júrdi. Ótken jyly biz barlyǵyn naqtylap kelisken bolatynbyz, biraq sodan keiin pandemiia bastaldy. Endi, sońǵy aptalarda biz óte jaqynbyz. Biz kelisimsharttyń sońǵy satylaryndamyz», - dedi.
«Men óte qýanyshtymyn. Meniń oiymsha, bul jekpe-jek ózim úshin jáne mansabym úshin, sondai-aq jankúierlerim úshin óte mańyzdy. Sharshy alańǵa ańyzǵa ainalǵan Pakiaomen shyǵý keremet», - deidi Garsiia.
Jaqynda WBA «sýper chempiony» Pakiao boksshynyń belsendiliginiń tómendigine bailanysty «demalystaǵy chempiondar» qataryna aýystyryldy. Ol sporttyq mansabyn saiasi mansappen biriktirýde. Ol – Filippinde senator, prezidenttikke úmitker.
