© Sputnik / Tabyldy Kadyrbekov
Oral qalasynda Anastasiia Chernoidyń ólimi boiynsha sot bastaldy. Ótken jyly qyrkúiek aiynda týystary ony birneshe kún boiy izdedi. Artynan qalanyń shetinen janyp ketken máiiti tabyldy.
Sotta kúdikti Temirlan Amanǵaliev qylmysqa qalai barǵanyn aityp berdi, dep habarlaidy Sputnik Qazaqstan agenttigi "Moi Gorod" portalyna silteme jasap.
"Anastasiia ekeýimiz kezdeisoq tanystyq. Ol kúni men sýpermarketke bardym. Sol jerde kólikke salynǵan aiyppuldyń aqshasyn kreditomat arqyly nesiege alýdy oiladym. Anastasiia da kredit alýǵa keldi", - deidi Amanǵaliev.
Ol kreditomat arqyly nesie alýdy bilmegen. Sodan qyzǵa ótinish jasap, jeke kýáligin bergen.
"Ol uzaq bir nárse istedi de, 28 myń teńge ǵana alǵanyn aitty. Aiyppulǵa jetpeitin edi. Sosyn kóbirek aqsha shyǵarýǵa bolatynyn aitty. Biraq ol úshin alǵan qaryzdy jabý kerek. Oǵan taǵy 20 myń teńge kerek boldy. Men dosyma habarlasyp, aqsha suradym", - dep atap kórsetti sottalýshy.
Amanǵaliev aqshany Anastasiia aitqan esepshot nómirine (ákesiniń nómiri) salyp jiberdi. Odan keiin ekeýi saýda úiiniń artynda aýlaǵa bardy. Ol jerge qyzdyń aǵasy da keldi. Ekeýi sóilesip turǵanda Amanǵaliev ketip qaldy. Al Anastasiiada jeke kýáliginiń qalyp qoiǵany esine túskende uialy telefonyna habarlasqan. Ol aldymen sharýam kóp dep shyqty. Odan keiin esirtki kerek ekenin aitty.
"Odan keiin men taǵy qońyraý shaldym da, dosymda SK ("Skorost" degen esirtki) bar, qazir alyp keledi dedim. Úide balalarǵa arnalǵan bir dárini taýyp aldym da, sony úgitip, gazetke oradym. Bilmei qalyp, jeke kýáligimdi qaitaryp beredi dep oiladym. Anastasiia kelgende ekeýimiz kireberiske óttik. Men oǵan qaǵazdy berdim. Ol ashyp, tilimen dámin kórdi. Sosyn ashýlanyp, aiqailai bastady. Men jeke kýáligimdi qaida dep suradym. Ol sómkede dedi. Ony alýǵa umtylǵanda aiqailap, meni tyrnai bastady. Ony iterip jibergim keldi. Qalai bolǵanyn da bilmeimin. Óltiretin oiym bolǵan joq", - dedi Amanǵaliev.
Kúdiktiń sózine qaraǵanda, Anastasiia basyn plitaǵa soǵyp, birden esinen tanyp qaldy. Oǵan alǵashqy kómek kórsetýden nátije shyqpady.
Osydan keiin Amanǵaliev qyzdyń máiitin kórpege orap, bos turǵan shkafqa saldy. Artynan mobildi qosymsha arqyly taksi shaqyryp, shkafty Mahambet aýylyna aparǵan. Sol jerde eski úii bar. Jańa úidiń qurylysyn da bastap ketken.
Biraq bireý shkafty ashyp qoiady dep qorqyp, tanysyna habarlasty. Onyń kóligimen eski shkafty kúl-qoqysqa aparyp tastaýdy ótingen. Alaida taǵy úreilenip, birden Fakel aýylyna qarai aidalaǵa aparyp tastady. Birshama ýaqyttan keiin qaitadan sol jerge aýyldasymen birge bardy.
Máitti qapqa salyp, Vetelki aýylyna qarai apardy. Sosyn ústine benzin quiyp, jaǵyp jiberdi. Al kýágerlerge "kiiktiń etin órtep jatyrmyn" dep aitqan.
Amanǵaliev ustalǵannan keiin birden óz kinásin moiyndady. Biraq tergeý kezinde aitqan sózinen birneshe ret ainyp, bergen kýáligin ózgertken.
Marqumnyń anasy qyzynyń esirtki paidalanǵanyn rastady. Marqumnyń artynda kishkentai qyzy qaldy.
Aita keteri, bas kezinde Temirlan Amanǵaliev adam óltirý faktisi boiynsha jaýapqa tartylǵan. Artynan 106-bapqa (Densaýlyqqa qasaqana aýyr ziian keltirý, abaisyzda jábirlenýshiniń ólimine ákep soqqan ne qylmystyq top jasaǵan is-áreketter) aýystyryldy.
Oǵan sáikes, 8 jyldan 12 jylǵa deiingi merzimge bas bostandyǵynan aiyrý jazasy qarastyrylǵan.
