11 maýsym kúni «The Queens’ Festival» shahmattan jahandyq áielder onlain festivali bastalady. Onyń aiasynda shahmattan qurlyqtyq jáne jahandyq áielder onlain-týrnirleri men úiretýge arnalǵan is-sharalar seriiasy ótedi, dep habarlaidy Qazaqstan shahmat federatsiiasynyń baspasóz qyzmeti.
FIDE (Halyqaralyq shahmat federatsiiasy) Áielder shahmat komissiiasy men FIDE is-sharalar komissiiasymen birlesip, Aziia shahmat federatsiiasy, Afrika shahmat konfederatsiiasy, Eýropalyq shahmat odaǵy jáne Amerika shahmat konfederatsiiasynyń qoldaýymen uiymdastyrylǵan biregei, jan-jaqty is-shara, shahmat ómiriniń barlyq aspektilerine áielderdi qatystyrý jáne álemde áielderdiń myqty shahmat qoǵamdastyǵyn damytýdy kózdeidi.
Netflix arnasynda shyqqan «Patshaiymnyń gambiti» (Queen's Gambit) serialynyń tanymaldyǵy men jetistigine negizdelgen bul shara dúniejúzindegi áiel shahmatshylardy, shahmat oiynyń uiymdastyrýshylardy, tóreshilerdi, yqpal etýshilerdi, kóshbasshylardy jáne túrli deńgeilerdegi shahmatshylardy biriktirip, kótermeleidi.
Aziia, Amerika, Afrika jáne Eýropa shahmatshylary «Queens Finals» jeke jáne komandalyq finalǵa ótý múmkindigi úshin aldymen onlain blits kvalifikatsiialyq týrnirde baq synaidy.
Barlyq qatysqysy keletinder Qazaqstan shahmat federatsiiasynyń office@kazchess.kz elektrondy poshtasyna 2021 jyldyń 5 maýsymyna deiin ótinim tastai alady.
Qatysý jarnasy – 10 dollar.
Festival aiasynda FIDE basqarýshy direktory Dana Reiznietse-Ozala men qazaqstandyq grossmeister Dinara Sádýaqasova jáne basqa da arnaiy qonaqtardyń qatysýymen seminarlar men túrli is-sharalar ótedi.
