Onlain formatta «Jańa jaǵdaidaǵy jastar: is-qimyl kezeńi» taqyrybynda «ZEREN» respýblikalyq jastarǵa bilim berý jobasynyń jabylýy ótti, dep habarlaidy "Ult aqparat" QR Parlamenti Senatynyń baspasóz qyzmetine silteme jasap.
Jiynda sóz alǵan Senat tóraǵasy Máýlen Áshimbaev qatysýshylardy kele jatqan Táýelsizdik kúnimen quttyqtap, jastardyń egemendikti saqtaýdaǵy jáne memlekettilikti nyǵaitýdaǵy mańyzdy rólin atap ótti.
«Jeltoqsan – halqymyz úshin qasterli ai. Sondyqtan bul ai tek toi-dýmanǵa sebep bolmaýy kerek. Kerisinshe, jeltoqsanda ótkennen ónege alyp, babalarǵa taǵzym etip, táýelsizdiktiń qadirin zerdeleýimiz qajet. Ásirese, ózderińizdei jastar elimizdi nyǵaitý jáne damytý úshin jumys isteýge tiis. Jastardyń eń basty missiiasy – elge qyzmet etý, eldi jańa belesterge jetkizý. Elge qyzmet etý degen bilik tutqasyn ustap, sheneýnik bolý degen sóz emes. Sizder árqaisyńyz óz salalaryńyzda jetistikke jetip, biikten kórinseńizder – eldiń damýyna qosylǵan eń úlken úles sol», - dedi Senat spikeri.
Máýlen Áshimbaev pandemiia sabaǵyna qatysty óz pikirin bólisti. Atap aitqanda, ol qorshaǵan orta men materialdyq resýrstarǵa uqypty qaraýdyń mańyzdylyǵyna toqtaldy.
«Tabiǵat pen qorshaǵan ortaǵa degen kózqaras ózgerýi kerek. El Prezidentiniń tikelei qatysýymen búginde ekologiialyq qozǵalys qarqyn alýda. Memleket basshysynyń bul bastamalaryn qoldaý mańyzdy. Adamdardyń jáne búkil memlekettiń kúndelikti ómirine Sustainable Development – ornyqty damý qaǵidattaryn engizý qajet. Pandemiianyń basty qorytyndylarynyń biri – tabiǵatqa uqypty qaraýdy damytyp, tutynýshylyq minez-qulyq úlgilerinen arylý», - dedi Máýlen Áshimbaev.
Senat tóraǵasynyń pikirinshe, biylǵy jyldyń taǵy bir sabaǵy –kúndelikti ómirde adami qatynastarǵa basymdyq berý.
«Pandemiia kezinde elimizde qiyn jaǵdaiǵa tap bolǵan jandarǵa riiasyz kómektesýge daiyn jaýapty adamdar kóp ekenine bárimiz kóz jetkizdik. Keshe ǵana Qasym-Jomart Kemeluly eriktiler jylynyń jabylýynda bul týraly jan-jaqty aitqan bolatyn. Rasynda da, biz otandastarymyzdyń igi isterimen maqtana alamyz. Bizdiń qoǵam, shyn máninde óte jaýapty ekenin jáne qazaqstandyqtar qandai da bir adamdar tap bolatyn problemalarǵa nemquraily qarai almaitynyn kórsetti», - dedi Máýlen Áshimbaev.
Sondai-aq, Senat spikeri pandemiia salaýatty ómir saltyn qalyptastyrý qajettiligin kórsetkenin atap ótti. Ásirese, immýnitetti kóterýge nazar aýdaryp, jaman ádetterden bas tartý jáne sportpen shuǵyldaný mańyzdy ekenine toqtaldy.
