«Nur Otan» partiiasy Tóraǵasynyń Birinshi orynbasary Máýlen Áshimbaev Býrabaida ótken «Jastar – Otanǵa!» jastar saiasi lageriniń ashylýynda jasotandyqtardyń aldynda turǵan basty mindetterdi atap ótti.
– Jasotandyqtar «Jas Otannyń» IV sezinde qabyldanǵan qorytyndy qujattaǵy bastamalardy júzege asyrýǵa basymdyq berýi tiis. Ekinshiden, partiia qyzmetin jańǵyrtý aiasynda qolǵa alynǵan jańa jobalardy júzege asyrýǵa da belsendi qatysýy kerek. Ásirese óńirlerde bul baǵyttaǵy jumystar qarqyndy júrgizilýi qajet. Úshinshiden, «Jas Otan» el jastaryn Elbasy saiasaty ortaq múddege toptastyratyn, barlyq jastar uiymdarynyń basyn biriktiretin qozǵaýshy kúsh bolýy tiis. Tórtinshiden, aýyl jastary «Jas Otannyń» basty nazarynda bolýy kerek. Partiia júzege asyryp jatqan mektep ashanalary men sport alańdaryn jańǵyrtý, IT-synyptar ashý, aǵylshyn tilin úiretý siiaqty partiialyq jobalar negizinen osy aýyl jastarynyń básekege qabilettiligin qamtamasyz etýge baǵyttalǵan. Sondyqtan jasotandyqtar osyndai partiialyq jobalardy júzege asyrýda kóbine aýydyq jerlerge basymdyq berý tiis. Besinshiden, «Jas Otan» jastar qanatynyń ókilderi Elbasynyń «Rýhani jańǵyrý» baǵdarlamasyn júzege asyrýǵa belsene qatysyp, ulttyq kodty saqtaý, mádeni muralarymyz ben qundylyqtarymyzdy dáripteý siiaqty basymdyqtardy júzege asyrýda júieli áreket etýi tiis, – dedi Máýlen Áshimbaev.
Sonymen qatar partiia Tóraǵasynyń Birinshi orynbasary partiialyq jańǵyrý aiasynda partiia tarapynan atqarylǵan jumystarǵa toqtaldy.
– Qazirgi tańda «Nur Otan» partiiasy Elbasy tapsyrmasyna sáikes partiia qyzmetin jańǵyrtý jumystaryn qarqyndy júrgizýde. Osy maqsatta 20-dan astam jańa joba qolǵa alyndy. Olardyń qatarynda jastar saiasatyn jandandyrýǵa qatysty tyń bastamalar da bar. Óitkeni jastar máselesi partiia jumysyndaǵy basym baǵyttardyń biri. Partiianyń bastamasymen jastardyń baǵdarlamalaý negizderin, robot tehnikalaryn jáne 3D modeldeýdi úirenýi úshin tegin «1000 IT-synyp» ashý jobasy júzege asyrylýda. Odan bólek, jas býynnyń durys tamaqtanýy men salamatty ómir saltyn ustanýyn qamtamasyz etý úshin mektep ashanalaryn jańǵyrtý jáne mektep sport alańdaryn qaita jabdyqtaý jumystaryn bastap kettik. Aýyl jastaryna aǵylshyn tilin úiretip, otandyq kitaphanalardy zamanaýi bilim ortalyǵy retinde qaita qurý bastamalary da partiia tarapynan iske asyrylýda, – dedi «Nur Otan» partiiasy Tóraǵasynyń Birinshi orynbasary.
Aita keteiik, «Jastar – Otanǵa!» jastar saiasi lageri biyl qatarynan onynshy ret ótkizilip otyr. Osylaisha «Jas Otan» jastar qanatynyń I sezinde Elbasynyń bastamasymen aktsiia retinde bastalǵan joba tyń ideialar talqylanatyn tiimdi alańǵa ainalyp otyr. Memlekettik deńgeidegi «Diplommen aýylǵa!», «Jastar kadrlyq rezervi» siiaqty iri jobalar dál osy lager jumysynyń nátijesinde qolǵa alynǵanyn erekshe atap ótken jón.
