Senat Tóraǵasy Máýlen Áshimbaev XVII Eýraziialyq media forýmyna qatysty. Bul týraly ol jelidegi paraqshasynda jazdy, dep habarlaidy "Ult aqparat".
«Búgin XVII Eýraziialyq media forýmǵa qatystym. Biylǵy forýmda dúnie júzin alańdatqan birqatar mańyzdy máseleler keńinen talqylanyp jatyr. Is-sharaǵa qatysýshylar pandemiiamen kúres, densaýlyq, qaýipsizdik, yntymaqtastyq jáne basqa da baǵyttar boiynsha óz oilaryn bildirip, usynys-pikirlerimen bólisýde.
Biz qatysqan plenarlyq sessiia Qazaqstan Táýelsizdiginiń 30 jyldyǵyna arnaldy. Osy jyldar ishinde Qazaqstan egemen el retinde tolyq qalyptasyp, aitarlyqtai jetistikterge qol jetkizdi. Shyn máninde, biz bar bolǵany úsh onjyldyqta ordaly elge ainaldyq. Shekaramyzdy shegendep, ekonomika men ishki jáne syrtqy saiasatta jasampaz sheshimder qabyldadyq. Táýelsiz memleket qurý jolynda saliqaly qadamdar jasadyq. Árine, áli de bolsa jetildiretin, tolyqtyratyn tustarymyz bar ekeni belgili. Aldaǵy ýaqytta sonyń bárin eńserip, eldigimizdi eńseli ete túsemiz dep senemin. Oǵan bizdiń áleýetimiz de, múmkindigimiz de tolyq jetedi», - dep jazdy Senat Tóraǵasy.
Ol sondai-aq qazirgi tańda biz úshin Táýelsizdikten asqan qundylyq joq. Sondyqtan egemendikti odan ári nyǵaitý – barsha qazaqstandyqtyń abyroily mindeti ekenin jetkizdi.
«Osy jolda ashyqtyq pen toleranttylyq asa mańyzdy. Sol sebepti Qazaqstan táýelsizdiktiń alǵashqy kúninen bastap búkil álemmen ashyq qarym-qatynas ornatyp, innovatsiiaǵa, ǵylym men bilimge jáne ózara yntymaqtastyqqa basa mán berip keledi.
Bul rette búgingi Forýmnyń da mańyzy zor. Qazaq eliniń álemge jahandyq máselelerdi talqylaityn osyndai alań usynýynyń ózi ashyqtyqtyń jarqyn kórinisi. Biyl is-shara onlain formatty qoldanyp ótkizilgenine qaramastan, ádettegidei álemge belgili ári bilikti spikerler men sarapshylar jumyldyrylǵan. Soǵan bailanysty kóptegen ózekti máseleniń sheshimin tabý úshin osyndai jiyndardyń bereri mol dep esepteimin jáne Forýmnyń aldaǵy jumysyna sáttilik pen tabys tileimin», - dep tolyqtyrdy ol.
