Senat tóraǵasy Máýlen Áshimbaev VII shaqyrylymdaǵy Parlamenttiń birinshi sessiiasyndaǵy jumysyn qorytyndylady, dep habarlaidy QazAqparat.
«Búgin biz jetinshi shaqyrylymdaǵy Parlamenttiń birinshi sessiiasyndaǵy Senattyń qorytyndy otyrysyn ótkizip otyrmyz. Sessiia barysynda Memleket basshysynyń elimizdi jańǵyrtý baǵdaryn zańnamalyq turǵydan qamtamasyz etý úshin aýqymdy jumys atqaryldy. Parlament 63 zań qabyldady. Olardyń ishinde 15-ine depýtattyq korpýs bastamashylyq jasady. Palatanyń qaraýyna túsken ár zań jobasy jan-jaqty qaralyp, turaqty komitetter men jalpy otyrystarda keńinen talqylandy. Azamattar men sarapshylar qoǵamdastyǵynyń usynystary da nazardan tys qalmady. Osy oraida, Prezidenttiń bastamashy bolýymen qabyldanǵan jerdi sheteldikterge satýǵa jáne jalǵa berýge tyiym salǵan zańdy erekshe atap ótken jón.
Osylaisha bul másele túbegeili sheshildi. Sailaý zańnamasyna mańyzdy ózgerister jasaldy. Aýyl ákimderin tikelei sailaý týraly norma qabyldandy. Saiasi partiialardyń Májilis pen máslihattarǵa ótý shegi tómendetildi jáne sailaý biýlletenderine «bárine qarsymyn» degen jol qosyldy», - dedi M. Áshimbaev.
Onyń aitýynsha, jergilikti memlekettik basqarý men ózin-ózi basqarýdy damytý boiynsha da sharalar qabyldandy. Aýyl halqynyń ózekti máselelerin tiimdi sheshý úshin jergilikti bilik organdaryna qosymsha fýnktsiialar men ókilettikter berildi. Senat depýtattary ekonomikalyq ósimdi qalpyna keltirýge, indettiń taralýyna tosqaýyl qoiýǵa, shaǵyn jáne orta biznesti qoldaýǵa kóp kóńil bóldi. Bul ózgeristerdiń túpki maqsaty – azamattarymyzdyń ál-aýqatyn arttyrý ekeni sózsiz.
«Ashyqtyqty arttyrý úshin kvazimemlekettik sektordyń satyp alýlary alǵash ret zańmen reglamentteldi. Sot-quqyq qorǵaý salasynda qabyldanǵan zańnamalyq ózgeristerdiń aýqymdy bóligi azamattardyń quqyqtarynyń qorǵalýyna, kásipkerlerdi zańsyz aralasýdan qorǵaýǵa baǵyttaldy. Memleket basshysynyń tapsyrmalaryn iske asyrý úshin ulttyq zańnamada alǵash ret «Áleýmettik kásipkerlik» uǵymyna anyqtama berildi. Memleket tarapynan osy baǵytty qoldaýdyń naqty sharalary men tetikteri belgilendi. Bul mańyzdy zań jobasyn senatorlar qysqa merzimde Úkimetpen jáne áleýmettik kásipkerlermen birlesip daiyndady», - dedi Senat tóraǵasy.
Byltyrǵy qyrkúiek aiynan beri senatorlar 7 zań jobasyna bastamashy bolyp, onyń 6-ýy qabyldandy. Sondai-aq, Senat depýtattarynyń bastamashylyǵymen taǵy 14 zań jobasy boiynsha jumys júrgizilýde. Senat qabyrǵasynda «Jahandaný dáýirinde ulttyq qundylyqtardy dáripteý – keshendi jańǵyrýdyń negizi» taqyrybyna arnalǵan parlamenttik tyńdaý ótkizildi. Otyrys barysynda ulttyq múddemizge qatysty mańyzdy máseleler kóterilip, tiisti usynymdar ázirlendi. Senatta Memleket basshysynyń tapsyrmasy boiynsha jaryq kórgen «Asharshylyq. Golod. 1928-1934. Derekti hronika» atty jańa eńbek kópshilikke tanystyryldy.
«Senatorlar óńirlerge baryp, halyqpen jáne eńbek ujymdarymen úsh júzge jýyq kezdesý ótkizdi. Budan bólek, turaqty komitetter ótkizgen 3 úkimet saǵaty, 5 kóshpeli otyrys, 40 dóńgelek ústel men kezdesý aiasynda Prezident tapsyrmalarynyń, zańdardyń jáne memlekettik baǵdarlamalardyń oryndalý barysy jan-jaqty qaraldy. Osy is-sharalarda qabyldanǵan usynymdar jaýapty memlekettik organdarǵa jiberildi. Onyń bári Senattyń baqylaýynda bolady. Aǵymdaǵy sessiiada áriptesterimiz 45 depýtattyq saýal joldap, ortalyq memlekettik organdardyń nazaryn ózekti máselelerge aýdardy jáne olardy sheshý joldaryn usyndy», - dedi Senat tóraǵasy.
Sonymen qatar ol 30 maýsymda birlesken otyrys ótetinin, onda birinshi sessiianyń jumysyna qorytyndy jasalyp, parlamettik kanikýl jariialanatynyn aitty.
«Parlamenttik kanikýl kezeńinde depýtattardyń jumysy toqtap qalmaityny belgili. Sizder óńirlerge baryp, halyqpen, jurtshylyqpen kezdesesizder. Sonyń aiasynda jergilikti jerlerdegi problemalardy zerdelep, syndarly usynystar jinaqtaisyzdar. Onyń barlyǵy da aldaǵy depýtattyq qyzmetimizge negiz bolatyny sózsiz», - dedi Áshimbaev.
