Máýlen Áshimbaevtyń tóraǵalyq etýimen Senat janyndaǵy Jergilikti ókildi organdarmen (máslihattarmen) ózara is-qimyl jónindegi keńestiń otyrysy boldy.
Onlain túrinde ótken otyrysqa Palata depýtattary, memlekettik organdardyń basshylary jáne elimizdiń barlyq óńirlerinen máslihat ókilderi qatysty, dep habarlaidy "Ult aqparat" QR Parlamenti Senatynyń baspasóz qyzmetine silteme jasap.
Senat tóraǵasy óz sózinde Memleket basshysynyń reformalaryn jańǵyrtý jónindegi kún tártibin zańnamalyq turǵyda qamtamasyz etý týraly jan-jaqty aityp berdi. Ol asa mańyzdy zań jobalaryn qaraýǵa máslihattar depýtattaryn belsendi túrde tartýǵa shaqyrdy. Senatorlardyń úshten ekisi aimaqtardan sailanǵanyn eskere kelgende mundai tyǵyz qarym-qatynastyń mańyzy óte zor.
«Ótken sailaýda Elbasy men Memleket basshysynyń bastamasymen júrgizilip jatqan saiasi reformalardyń áleýeti iske asyryldy deýge ábden bolady. Alǵash ret máslihat depýtattary partiialyq tizim boiynsha sailandy. Áielder men jastarǵa arnalǵan kvota da alǵash ret qoldanyldy. Sailaý nátijesinde jergilikti ókildi organdar 70 paiyzǵa jańaryp, máslihattardyń sapaly quramy qalyptasty», - dedi Máýlen Áshimbaev.
Senat tóraǵasynyń pikirinshe, Prezident bastamalarynyń tabysty iske asýy zańnamalyq bazanyń ózgerýine ǵana emes, halyqpen túsindirý jumystarynyń qanshalyqty sapaly júrgizilip jatqanyna da bailanysty. Sondyqtan Máýlen Áshimbaevtyń pikirinshe, máslihattar men Senat osy baǵytta ózara belsendi is-qimyl jasaýy tiis.
«Senat depýtattary únemi aýdandyq, qalalyq, oblystyq máslihattarmen ózara tyǵyz bailanysta bolýy kerek. Sonyń barysynda jergilikti deńgeidegi ózekti máseleler jáne qoldanystaǵy zańnamanyń tiimdiligi talqylanady. Nátijesinde biz halyqty tolǵandyrǵan máselelerdi anyqtap, olardy sheshýdiń tiimdi joldaryn qalyptastyratyn bolamyz. Jumysymyzdaǵy mańyzdy baǵyttardyń taǵy biri halyqqa Memleket basshysynyń saiasatyn jáne qabyldanǵan zańdardyń máni men mańyzyn túsindirý», - dedi Máýlen Áshimbaev.
Otyrysta Ulttyq ekonomika ministri Áset Erǵaliev te sóz sóiledi. Ol «Qazaqstan Respýblikasynyń keibir zańnamalyq aktilerine aýdandyq, qalalyq jáne aýyldyq bilik deńgeileriniń derbestigi men jaýapkershiligin keńeitý máseleleri boiynsha ózgerister men tolyqtyrýlar engizý týraly» zań jobasynda belgilengen jergilikti memlekettik jáne ózin-ózi basqarýdy damytýdyń negizgi tásilderine toqtaldy. Al máslihat ókilderi jergilikti ókildi organdar qyzmetiniń negizgi aqparattyq-uiymdastyrýshylyq máseleleri týraly aityp berdi.
