Foto: Prezident baspasóz qyzmeti
Máýlen Áshimbaev qaitadan Senat tóraǵasy bolyp sailandy, - dep habarlaidy "Ult aqparat".
"Depýtattar jasyryn daýys berý arqyly el Prezidenti usynǵan kandidatýrany biraýyzdan maquldady. Áshimbaevty sailaýǵa 50 depýtat daýys berdi, qarsy daýlar joq", - delingen habarlamada.
Aita keteiik, búgin Memleket basshysy Qasym-Jomart Toqaev joǵary palata otyrysynda Senat tóraǵasy laýazymyna Máýlen Áshimbaevtyń kandidatýrasyn usynǵan edi.
"Ózderińiz bilesizder, meniń Jarlyǵymmen Máýlen Saǵathanuly Áshimbaev Senat depýtaty bolyp taǵaiyndaldy. Konstitýtsiianyń 58-babynyń 1-tarmaǵyna sáikes Senat Tóraǵasy laýazymyna Máýlen Saǵathanuly Áshimbaevtyń kandidatýrasyn usynamyn. Ol buǵan deiin osy mindetti abyroimen atqardy. Zań shyǵarý jumysyn jaqsy biledi. Memlekettik qyzmettegi tájiribesi mol. Sondyqtan ony Senat Tóraǵalyǵyna laiyq dep sanaimyn. Senattyń qyzmeti tabysty bolsyn", – dedi Prezident.
Eske salaiyq, Áshimbaev 2020 jyldyń mamyrynan 2023 jyldyń qańtaryna deiin Senat tóraǵasy qyzmetin atqarǵan.
Máýlen Saǵathanuly 1971 jylǵy 28 qańtarda Almatyda týǵan.
Ál-Farabi atyndaǵy Qazaq ulttyq ýniversitetin jáne Tafts ýniversitetiniń Fletcher atyndaǵy quqyq jáne diplomatiia mektebin (AQSh) bitirgen. Ekonomist - politekonomiia muǵalimi, halyqaralyq qatynastar magistri. Saiasi ǵylymdar kandidaty.
1993-1994 jyldary Baspasóz jáne buqaralyq aqparat ministrliginiń júiesinde jumys istegen. 1994 jylǵy mamyr – 1995 jylǵy naýryz aralyǵynda – Qazaqstan Respýblikasy Joǵarǵy Keńesi depýtatynyń kómekshisi.
1995 jylǵy maýsym – qarasha aralyǵynda – Qaýipsizdik Keńesi Apparatynyń konsýltanty. 1995 jylǵy qarasha – 1999 jylǵy sáýir aralyǵynda - Qazaqstan Respýblikasy Prezidenti Ákimshiligi Saraptaý jáne strategiialyq zertteýler ortalyǵynyń bas sarapshysy, sektor meńgerýshisi, basshysynyń birinshi orynbasary.
1999 jylǵy sáýir – 2000 jylǵy mamyr aralyǵynda – Qaýipsizdik Keńesi Saraptaý ortalyǵynyń meńgerýshisi. 2000 jylǵy mamyr – 2002 jylǵy aqpan aralyǵynda – Qaýipsizdik Keńesi Saraptaý ortalyǵynyń meńgerýshisi – Qazaqstan Respýblikasy Prezidenti janyndaǵy Strategiialyq zertteýler institýtynyń direktory.
2002 jylǵy aqpan – 2005 jylǵy mamyr aralyǵynda – Qazaqstan Respýblikasynyń Prezidenti janyndaǵy Strategiialyq zertteýler institýtynyń direktory. 2005 jylǵy mamyr – 2006 jylǵy sáýir aralyǵynda – Qazaqstan Respýblikasy Qaýipsizdik Keńesi hatshysynyń orynbasary.
2006 jylǵy sáýir – 2011 jylǵy qazan aralyǵynda – Qazaqstan Respýblikasy Prezidenti Ákimshiligi Basshysynyń orynbasary. 2012 jylǵy qańtar – 2018 jylǵy aqpan aralyǵynda –besinshi, altynshy shaqyrylymdaǵy Qazaqstan Respýblikasy Parlamenti Májilisiniń depýtaty, Halyqaralyq ister, qorǵanys jáne qaýipsizdik komitetiniń tóraǵasy.
2018 jylǵy aqpan – 2019 jylǵy maýsym aralyǵynda – «Nur Otan» partiiasy Tóraǵasynyń birinshi orynbasary. 2019 jylǵy shilde – jeltoqsan ailarynda – Qazaqstan Respýblikasy Prezidentiniń kómekshisi. 2019 jylǵy jeltoqsan - 2020 jylǵy mamyr aralyǵynda – Qazaqstan Respýblikasy Prezidenti Ákimshiligi Basshysynyń birinshi orynbasary.
2020 jyldyń mamyrynda Qazaqstan Respýblikasy Prezidentiniń Jarlyǵymen Qazaqstan Respýblikasy Parlamenti Senatynyń depýtaty bolyp taǵaiyndaldy, altynshy shaqyrylymdaǵy Qazaqstan Respýblikasy Parlamenti Senatynyń Tóraǵasy bolyp sailandy.
2023 jyly qańtarda Prezident Jarlyǵymen Senat depýtaty bolyp qaita taǵaiyndaldy.
«Parasat», «Qurmet» ordenderimen, Qazaqstan Respýblikasynyń Qurmet gramotasymen jáne merekelik medaldarmen marapattalǵan.
