Memleket basshysy Senat tóraǵasy Máýlen Áshimbaevty qabyldady, dep habarlaidy Aqorda.
Qasym-Jomart Toqaevqa Parlament Senatynyń VII sessiiasy barysynda atqarylatyn jumys jospary týraly baiandaldy. Sondai-aq Prezidenttiń Joldaýy men bergen tapsyrmalaryn iske asyrýǵa baǵyttalǵan birqatar zań toptamasynyń ázirlenip jatqany jóninde málimet berildi.
QR Parlamenti Senatynyń tóraǵasy aldaǵy sessiiada senatorlardyń Úkimetpen jáne Májilis depýtattarymen birlesip, áielder men jastar úshin 30 paiyzdyq kvotanyń saqtalýyna qatysty zańnama boiynsha jumys isteitinin aitty. Sonymen qatar «Áleýmettik kodeks», «Ónerkásip saiasaty týraly», «Kásibi biliktilik týraly», «Jeke qosalqy sharýashylyqtar týraly» jáne basqa da zańdarǵa ózgertýler men tolyqtyrýlar engizý mindeti tur.
Máýlen Áshimbaevtyń aitýynsha, senatorlardyń bastamasymen Prezident tapsyrmalaryn iske asyrýǵa baǵyttalǵan birqatar zań jobasy ázirlengen. Atap aitqanda, «Adam quqyqtary jónindegi ýákil týraly» zań jobasy josparlanýda, sonymen qatar ǵylymi kadrlardyń jaǵdaiyn jaqsartý jáne olardyń áleýmettik qorǵalý kepildikteri týraly zańnamasyna, Salyq kodeksine ózgertýler engizý kózdelýde. Sondai-aq jaiylymdyq jerlerdi basqarýdy jáne paidalanýdy retteitin birqatar túzetýler ázirlenip jatyr.
Qasym-Jomart Toqaev «Halyq únine qulaq asatyn memleket» tujyrymdamasyn iske asyrý aiasynda qabyldanatyn zań jobalaryn talqylaý jáne pysyqtaý jumystaryna azamattyq qoǵam ókilderi men sarapshylardy keńinen jumyldyrý qajettigin aitty.
Kezdesý sońynda Prezident parlamenttik diplomatiianyń áleýetin odan ári arttyrýǵa qatysty birqatar mindet júktedi.
Sonymen qatar Memleket basshysy 2022 jyly ótetin Álemdik jáne dástúrli dinder kóshbasshylarynyń VII sezine daiyndyqty bastaý týraly tapsyrma berdi.
