Qazaqstan Parlamenti Senatynyń Spikeri Máýlen Áshimbaev jumys saparymen Italiia Respýblikasyna bardy, dep habarlaidy "Ult aqparat" QR Parlamenti Senatynyń baspasóz qyzmetine silteme jasap.
Sapar aiasynda ol Italiia Parlamenti Senatynyń Tóraǵasy Mariia Elizabetta Alberti-Kazelattimen kezdesti.
Kezdesý barysynda taraptar Qazaqstan men Italiia arasyndaǵy parlamentaralyq bailanysty nyǵaitý máselesin talqylady. Sondai-aq eki eldiń ekonomika, saýda, týrizm, mádeniet jáne taǵy basqa baǵyttar boiynsha yntymaqtastyǵyn arttyrýǵa yqpal etýde depýtattardyń belsendi jumysy mańyzdy ekeni sóz boldy.
Máýlen Áshimbaev senatorlardyń elimizdegi biznes-ahýaldy jaqsartýǵa arnalǵan zańnamalyq jumysyna toqtalyp ótti. Osyǵan orai ol óńiraralyq yntymaqtastyq arqyly eki eldiń saýda-ekonomikalyq bailanystaryn keńeitýdi jáne bul jumysqa senatorlardy jumyldyrýdy usyndy.
«Óńiraralyq yntymaqtastyq arqyly Qazaqstannyń saýda-ekonomikalyq bailanystarynyń áleýetin arttyrýǵa múmkindik bar. Qazaqstan men Italiia Senattaryndaǵy depýtattyq quramnyń óńirlik ókildik sipatyn eskere otyryp, parlamentshilerdiń bilimi men tájiribesin eki eldiń óńirleri arasynda bailanys ornatýǵa jumyldyrýǵa bolady dep esepteimiz. Atap aitqanda, parlamenttik delegatsiialardyń saparlary kezinde óńirlermen tanysý jáne basqa da is-sharalar qyzyǵýshylyq týdyrýy múmkin», – dedi Máýlen Áshimbaev.
Suhbat kezinde jasyl ekonomikany damytý jáne osy baǵyttaǵy zań shyǵarý tájiribesimen almasý máselesi de sóz boldy.
«Jasyl ekonomikany damytý Qazaqstan úshin Memleket basshysy belgilep bergen basymdyqtardyń biri. Bul másele boiynsha da bizdiń birlesip jumys isteýimizge zor múmkindik bar. Sondyqtan energiialyq turǵydan tiimdi, tabiǵi taza tehnologiialardy engizý isinde italiialyq seriktestermen yntymaqtastyq ornatamyz dep úmittenemiz. Osy oraida qorshaǵan ortany qorǵaýǵa jáne «jasyl» tehnologiiany engizýge qatysty quqyqtyq bazany jetildirý máselesinde Qazaqstan men Italiia Parlamentteri Senattarynyń tájiribe almasýyna múmkindk mol», – dedi Máýlen Áshimbaev.
Óz kezeginde Mariia Elizabetta Alberti-Kazelatti elderimiz arasyndaǵy parlamentaralyq yntymaqtastyqtyń joǵary deńgeii týraly aitty. Onyń aitýynsha, ekijaqty kún tártibindegi máselelerdi sheshý úshin parlamentshilerdi belsendi jumyldyrýdyń mańyzy zor.
Odan bólek, suhbattasýshylar Qazaqstan men Italiia Senattary arasynda turaqty dialogty jalǵastyrý ekijaqty yntymaqtastyqty nyǵaitýdyń mańyzdy tetigi ekenin aitty. Sondai-aq Máýlen Áshimbaev eki eldiń Palatalary arasynda turaqty jumys isteitin konsýltatsiia tetigin qurý máselesin qarastyrýdy usyndy.
Sonymen qatar Qazaqstan Parlamenti Senatynyń Tóraǵasy Italiia Parlamentindegi «Qazaqstan-Italiia» parlamenttik dostyq tobynyń ókilderimen kezdesti.
