Qazaqstan Respýblikasy Parlamenti Senatynyń tóraǵasy – Álemdik jáne dástúrli dinder liderleri Sezi Hatshylyǵynyń basshysy Máýlen Áshimbaev Dúniejúzilik Islam Ligasy Bas hatshysynyń keńesshisi Abdýl Áziz Ben Ahmad Sarhanmen kezdesti, dep habarlaidy "Ult aqparat".
Óz sózinde Senat spikeri meimanǵa Sezd Hatshylyǵynyń HIH otyrysyna qatysqany úshin alǵys bildirip, Forýmnyń negizgi maqsattary islam áleminiń oń pikiri men qoldaýyna ie bolǵanyn atap ótti.
«Ýaqyt ótken saiyn Sezdiń halyqaralyq arenadaǵy mańyzy artyp keledi. Aldaǵy ýaqytta Nur-Sultan qalasyndaǵy dinaralyq dialog beibitshilikti, kelisimdi jáne yntymaqtastyqty halyqaralyq deńgeide qamtamasyz etýdiń mańyzdy faktory retinde óz rólin atqara beredi dep senemiz», – dedi Máýlen Áshimbaev.
Sonymen qatar suhbattasýshylar pandemiiaǵa bailanysty qajylyq jasaý kezinde týyndaityn qiyndyqtardy talqylady. Senat tóraǵasy pandemiiadan keiingi kezeńde jaǵdai turaqtalyp, Qazaqstan azamattary ózderiniń dini paryzdaryn óteýge qaitadan múmkindik alaryna úmittenetinin jetkizdi.
Is-shara sońynda M. Áshimbaev Dúniejúzilik Islam Ligasynyń Bas hatshysyna 2022 jylǵy qyrkúiek aiynda Qazaqstan astanasynda ótetin Álemdik jáne dástúrli dinder liderleriniń VII Sezine qatysý úshin shaqyrý joldady.
