Parlament Senatynyń Tóraǵasy Máýlen Áshimbaev AQSh Kongresiniń senatory Stiv Deinspen kezdesti. Onda taraptar ekijaqty parlamentaralyq yntymaqtastyqty odan ári nyǵaitý máselelerin talqylady, dep habarlaidy "Ult aqparat".
Suhbat barysynda Qazaqstan-AQSh qarym-qatynasyn damytýda joǵary deńgeidegi memleketaralyq turaqty saiasi dialogtyń yqpaly zor ekeni aityldy. Byltyr qyrkúiek aiynda eki eldiń Prezidentteri Qasym-Jomart Toqaev pen Djo Baiden Niý-Iorktegi BUU Bas Assambleiasy alańynda ótken S5+1 sammiti aiasynda kezdesken edi. Sondai-aq ótken jyldyń aqpanynda AQSh-tyń Memlekettik hatshysy Entoni Blinken Qazaqstanǵa resmi saparmen kelgeni belgili.
Kezdesýde kópjaqty jáne parlamentaralyq bailanysty damytý máselelerine de basa mán berildi.
«Eki eldiń Prezidentteri ózara qarym-qatynasymyzdyń strategiialyq basymdyqtary men kún tártibin belgilep, Qazaqstan-Amerika bailanysyn ári qarai damytý úshin mańyzdy qadamdar jasady. Qazirgi tańda memleketterimiz arasynda qarqyndy saiasi dialog qalyptasqan. Saýda-ekonomikalyq ózara is-qimyl da belsendi damyp keledi jáne aýqymdy sharttyq-quqyqtyq baza bar. Elderimizdiń liderleri belgilep bergen tyǵyz yntymaqtastyq basqa salalarda, onyń ishinde zań shyǵarýshy organdar arasynda da joǵary deńgeide qoldaý tabýǵa tiis», – dedi Máýlen Áshimbaev.
Sonymen qatar suhbattasýshylar Parlament depýtattarynyń saýda-ekonomikalyq yntymaqtastyq baǵytyndaǵy birlesken jumysyn jáne basqa da máselelerdi talqylady.
Senat Spikeri Parlamenttiń Memleket basshysynyń bastamasymen qolǵa alynǵan reformalardy zańnamalyq turǵydan qamtamasyz etý baǵytyndaǵy jumysyna, sondai-aq, Álemdik jáne dástúrli dinder liderleri Seziniń Tujyrymdamasynyń iske asyrylý barysyna da toqtalyp ótti.
Óz kezeginde Stiv Deins Qazaqstanda júrgizilgen keshendi jańǵyrýlardy joǵary baǵalady. Sondai-aq senator bizdiń elde demokratiiany damytýǵa, jańa ekonomikalyq úlgige kóshýge jáne rýhani diplomatiiany órkendetýge arnalǵan sharalardyń tiimdiligine nazar aýdaryp, ózara birlesken jumysty jandandyrýǵa beiil ekenin atap ótti.
