Astana qalasyndaǵy №2 Esil aýdandyq sotynda Seiitqazy jáne Áset Mataevtardyń isi boiynsha kýágerlerden jaýap alý odan ári jalǵasýda. Búgingi sot otyrysynda kýágerler «Salyqtan jaltardy» degen ekinshi epizod boiynsha sotqa túsinik berdi.
«Men 2007 jyly «Ulttyq baspasóz klýby» qoǵamdyq birlestigine jumysqa qabyldanǵanda qandai da bir qujattarǵa qol qoidym. Biraq onyń eńbek sharty ekeni esimde joq. Biletinim, meniń jalaqymnan zeinetaqy qoryna aqsha aýdarylǵan emes»,- dep málimdedi kýáger, «Ulttyq baspasóz klýby» qoǵamdyq birlestiginiń shtattan tys qyzmetkeri Qudaiberdi Májenov.
«Seiitqazy Mataevpen 2007 jyly tanystym. Ol meni «Ulttyq baspasóz klýbyna» jumysqa shaqyrdy. Men Astanadaǵy «Ulttyq baspasóz klýbynyń» ǵimaratyndaǵy bólmelerdi jalǵa berý mindetin atqardym. Maǵan Mataev ár úsh jyl saiyn jeke senimhat berip otyrdy. Alǵashynda ai saiyn 135 myń teńge, keiinirek 160-165 myń teńge aldym. 2015 jyldan bastap eńbekaqym 170 myń teńgege kóbeidi», - dedi kýáger sottaǵy sózinde. Onyń aitýynsha, «Ulttyq baspasóz klýby» qoǵamdyq birlestigi 14 adamǵa jalaqy tóleidi. Biraq eshkimmen arnaiy eńbek sharty jasalmaǵan.
Ol prokýrordyń: «Siz «Ulttyq baspasóz klýby» qoǵamdyq birlestigimen eńbek shartyn jasadyńyz ba?» degen suraǵyna: «Esimde joq. 2007 jyly qandai da bir qujattarǵa qol qoiǵanmyn»,- dep óz sózine kúmánmen jaýap qaiyrdy. Atap aitarlyǵy, Qudaiberdi Májenov kúni búginge deiin «Ulttyq baspasóz klýby» qoǵamdyq birlestiginiń Astanadaǵy ǵimaratynda ákimshi bolyp jumys isteidi.
Seiitqazy Mataev Q. Májenovke ǵimarattardy ustap turýǵa ai saiyn qomaqty qarajat aýdaryp otyrǵan. Birde onyń kólemi 970 myń teńgeni, al keide 1 mln 500 myń teńgeni quraǵan. Biraq ol bul aqshalardyń «Ulttyq baspasóz klýby» qoǵamdyq birlestiginen túskenin bilmegen. Aitarlyǵy, ol aqsha ókildiktiń qyzmetkerlerine ailyq eńbekaqy retinde berilgenimen, azamattyq tulǵalardyń barlyǵy qoǵamdyq birlestiktiń is júzindegi ne múshesi, ne qyzmetkeri bolmaǵan.
«Ulttyq baspasóz klýbynda» shtattan tys kýrer bolyp jumys istegen Mira Imaǵanbetova da eńbek shartyn jasamaǵan. Soǵan qaramastan ai saiyn 150 myń teńge jalaqy alǵan. Resmi jumysqa tirkelmegendikten zeinetaqy qoryna eshqandai aqsha aýdarmaǵan. Jeke tabys salyǵan da tólemegen. «Meni jumysqa qabyldaǵanda eshkim qujat suramady. Aptasyna eki-úsh ret jumysqa bardym. Negizinen «Ulttyq baspasóz klýbynyń» qujattaryn qala ishindegi mekemelerge jetkizdim»,- dep áńgimeledi sotta M. Imaǵanbetova. Aitarlyǵy, 2011 jyly onyń banki kartochkasyna ai saiyn 150 000 teńge túsip turǵan. Ol bul aqshanyń «Ulttyq baspasóz klýbynan» ekenin bilmepti. Óitkeni qoǵamdyq birlestik zeinetaqy qoryna aqsha aýdarmaǵan, jeke tabys salyǵyn, áleýmettik salyqty tólemegen. Saiyp kelgende, mekemege eshqandai eńbek shartyn jasamai jumysqa qabyldanǵan, tipti jumysqa qabyldaý týraly eshqandai buiryq shǵarylmaǵan.
Tergeýdiń nusqasy boiynsha, Seiitqazy Mataev 2011-2015 jyldary óziniń týystary men «Ulttyq baspasóz klýbynyń» múshesi bolyp tabylmaityn basqa da azamattardyń kartochkasyna 264, 7 mln. teńge aýdarǵan. Alaida S. Mataev jaýapty tulǵa retinde ol aqshadan jeke tabys salyǵyn tóleýi tiis bolǵan, ol úshin deklaratsiia tapsyrý mindetti. Saiyp kelgende, tergeýdiń nusqasy boiynsha Seiitqazy Mataev 2011-2015 jyldary 300 mln. teńgeden astam salyq tóleýden jaltarǵan.
Ámirlan Álimjan
