Sýret: primeminister.kz
Májilis depýtattaryna «Mass-media týraly» zań jobasyn birinshi oqylymda tanystyrǵan Aida Balaevaǵa «QosLike», «Qalaýlym» siiaqty baǵdarlamalardy jabý múmkindigi týraly suraq qoiyldy, dep habarlaidy Kazinform.
«Bizde qoǵamnyń narazylyǵyn týdyrǵan baǵdarlamalar kóp. «QosLike», «Qalaýlymdaryńyzdy» aitpaǵannyń ózinde, odan basqasy da bar. Onyń zardabyn da halyq tartyp jatyr. Jańaǵy anaý-mynaý baǵdarlamalardan tanylyp alǵan jastar onlain oiyn platformalaryn jarnamalaidy, dálel bar. Onyń syrtynda neshe túrli tok-shoý bar. Óziniń qyzymen jynystyq qatynasta bolǵan áke týraly baǵdarlamany, jynysyn aýystyrǵan adamdardy biz nege telearnalardan kórýimiz kerek? Osyǵan monitoring jasap, toqtatý týraly usynys berdik. «Mass-media» týraly zańnyń aiasynda osylardy toqtatý týraly tetik bar ma?», - dep surady depýtat Rinat Zaitov.
Ministr A.Balaeva depýtat ataǵan baǵdarlamalardy jasaýǵa biýdjetten qarjy bólinbeitinin atap ótti.
«Siz aityp otyrǵan baǵdarlamalar kóp pikirtalas týdyryp jatqany anyq. Ana retinde, memlekettik qyzmetshi retinde men sizdiń janaiqaiyńyzdy túsinip otyrmyn. Dese de, biz memlekettik organ retinde mundai baǵdarlamalarǵa qarjy bólmeimiz. Buǵan men kepildik beremin. Oǵan aqsha tólenbeidi. Ondai baǵdarlamalar buqaralyq aqparat quraldarynyń óz tabysyna jasalady. Dese de, ol másele jalpy bizdiń qoǵamnyń bolashaǵyna yqpalyn tigizetin bolǵannan keiin men osy máseleni ekinshi oqylymda qaraýǵa daiynmyn. Ekinshiden, sol buqaralyq aqparat quraldarynyń jetekshilerin shaqyryp, osy máselege qatysty talqylaý jasaýǵa daiynmyn. Óitkeni onyń kontseptsiiasy bar. Ol endi bir jyldyq, eki jyldyq dúnie emes qoi. Qansha jyldan beri aityp júrmiz?! Ókinishke qarai, sondai baǵdarlamalardy tapjylmai qarap otyratyn adamdar da bar. Sondyqtan osyny durystap qaraiyq. Men oǵan kelisemin», - dedi Aida Balaeva.
