Foto: pixabay.com
Májilis depýtattaryna «Mass-media týraly» zań jobasyn birinshi oqylymda tanystyrǵan Aida Balaeva talai pikirtalasqa taqyryp bolǵan «baspasóz kartasy» týraly normaǵa túsinik berdi, dep habarlaidy Kazinform agenttigi.
«Biz, «Amanat» fraktsiiasy bul normaǵa úzildi-kesildi qarsymyz. Mundai quityrqy formatty shekteý normalaryn engizýdi qoiý kerek dep esepteimiz. Osyǵan orai, Májilistegi «Amanat» fraktsiiasy óz alańdaýshylyǵyn bildirip, salystyrmaly kesteden ol normany alyp tastaýdy usynǵan. Naqty suraǵym: osy normaǵa salalyq ministr retinde kózqarasyńyz qandai? Jýrnalister qaýymy men «Amanat» depýtattarynyń ustanymyn qoldaisyz ba?», – dep surady Májilis depýtaty Aidos Sarym.
Ministr bul normany zań jobasynda qaldyrý nemese qaldyrmaý máselesi áli naqty sheshilmegenin aitty.
«Bul tarmaq, bastama jýrnalisterdiń eshqandai quqyǵyn buzbaidy. Sebebi bizdiń ministrliktiń 2024 jylǵy jumys josparynda media salasyndaǵy barlyq máseleni retteý úshin mediaplatforma jasaqtap, iske qosýdy qarastyryp otyrmyz. Ol BAQ-tyń zańdy esepke turýy, esepten shyǵýy, gazet-jýrnaldardyń túpnegizin saqtaý, akkreditteý máselelerin avtomattandyrý úshin qurylady. Bul – jýrnalisterdiń jumysyn jeńildetýge baǵyttalǵan norma bolatyn. Bul norma depýtattar korpýsyn da, jýrnalisterdi de ekige bólip otyrǵanyn eskerip, ekinshi oqylymǵa deiin taǵy da jan-jaqty qarap, ortaq bir mámilege kelsek bolady. Biz belden basyp, tek qana ózimizdiń normamyzdy engizemiz degen másele joq», – dedi ministr.
