Foto: senate.parlam.kz
Qazaqstanda qos azamattyǵy bar máslihat depýtattary anyqtaldy. Bul týraly Senat tóraǵasy Máýlen Áshimbaev aitty, dep habarlaidy QazAqparat agenttigi.
«Ministrlik málimetine qaraǵanda, 2022 jyly qos azamattyqtyń 841 deregi anyqtaldy. Al biyl qańtar-qazan aralyǵynda 525 qos azamattyǵy bar adam anyqtaldy. Qos azamattyǵy barlardyń arasynda jergilikti ókildi organdardyń depýtattary da bolǵan jaǵdailar bar», - dedi Áshimbaev Senattyń jalpy otyrysynda.
Bul turǵyda Senat tóraǵasy elimizde zań talaptaryn buzatyndardy jyldam anyqtaý kerek ekenin aitty. Iaǵni elimizdiń Konstitýtsiiasynda qos azamattyqqa tyiym salynǵan.
Budan buryn habarlanǵandai, jaqynda Ishki ister ministrligi qos azamattyǵy bar adamdardy Qazaqstan aýmaǵynan shyǵarýǵa qatysty túsinik berdi.
«Degenmen Qazaqstan Respýblikasynyń azamattyq týraly zańnamasyn buzǵany úshin sońǵy bes jylda 3 515 (2018 jyly – 522, onyń ishinde 425-ine aiyppul salynyp, 97-si elden shyǵaryldy. 2019 jyly – 449, onyń ishinde 393-ine aiyppul salynyp, 56-sy elden shyǵaryldy. 2020 jyly – 585, onyń ishinde 543-ine aiyppul salynyp, 42-si elden shyǵaryldy. 2021 jyly – 1118, onyń ishinde 978-ine aiyppul salynyp, 140 elden shyǵaryldy. 2022 jyly - 841, onyń ishinde 703-ine aiyppul salynyp, 138 elden tys jerge shyǵaryldy) adam ákimshilik jaýapkershilikke tartyldy. Olardyń kóbisi – Resei azamattary. Bul rette qos azamattyq faktileri anyqtalǵan barlyq adam Qazaqstan azamattyǵynan aiyrylady», - delingen vedomstvo málimetinde.
Eske salaiyq, 2020 jyly Pavlodar oblysyndaǵy ishki ister organynda qyzmet etken mamanda qos azamattyq bolǵany habarlanǵan edi.
