Máskeý qalasynyń tergeýshileri qazaq mádenieti qoǵamynyń basshysy Ernazar Nurievtiń isin sotqa joldady. Oǵan "biýdjet qarajatyn jymqyrdy" degen aiyp taǵylyp otyr, dep habarlaidy Sputnik agenttigi NTV arnasyna silteme jasap.
Osydan úsh jyl buryn Máskeýde "Altyn kúz" festivali ótken bolatyn. Tergeý materialdaryna sáikes, jergilikti biýdjetten osy sharaǵa 2 million rýbl (11 560 000 teńge) bólindi. Alaida tekseris kezinde biýdjet qarajatynyń tolyǵymen igerilmegeni anyqtaldy. Kelisimshart boiynsha baiqaý finalisteri qonaqúide qonystanýy tiis edi. Olardyń bireýi de qonaqúige barmady. Biraq aqshasy tólenip qoidy degen esep-qisap bar.
Jalpy, Nuriev 400 000 rýbl (2 320 000 teńge) jymqyrdy degen kúdikke ilindi. Ony ustaý kezinde páterin buzyp kirýge týra keldi. Sebebi quqyq qorǵaýshylar men arnaiy jasaq qyzmetkerlerine esik ashpady. Úide aqsha tabylmady. Degenmen, qajetti aiǵaq bar. Ázirshe, tergeýshiler Nurievtiń bir qylmysqa qatysy bar ekenin dáleldedi. Onyń ózi de kinásin moiyndap otyr.
Qyzmet babyn paidalanyp, alaiaqtyq jasaǵany úshin qazaq mádenieti qoǵamynyń basshysy 10 jylǵa bas bostandyǵynan aiyrylýy múmkin.
