Máskeýdegi záýlim ǵimarattyń 86-qabatynan qulaǵan qazaqstandyq qyz qaza boldy. Máskeýdegi tergeý komiteti qaiǵyly oqiǵaǵa qatysty tergeýdi bastady, dep habarlady Sputnik agenttigi Ren TV arnasyna silteme jasap.
BAQ-tyń habarlaýynsha, qyzdyń esimi Diana Belorýkova. Ol "Máskeý-siti" kesheniniń "Oko" munarasynyń jan-jaqty kórýge arnalǵan alańynan qulaǵan. Keleńsiz jaǵdaidyń sebebin Máskeý tergeý komiteti anyqtaidy.
Qaiǵyly oqiǵa 11 maýsymda Máskeý ýaqytymen 16:55-te boldy.
Qazaqstan syrtqy ister ministrliginiń resmi ókili Aibek Smadiiarov oqiǵanyń mán-jaiy anyqtalyp jatqanyn málimdedi. Sondai-aq marqum Qazaqstan azamaty ma, joq pa, ol da tekserilýde.
Eske salsaq, 2018 jyldyń sáýirinde Qazaqstannan barǵan 21 jastaǵy MHQMI stýdenti Tomiris Baisafa oqý orny ǵimaratynyń tórtinshi qabatynan qulap tústi. Ol aýrýhanaǵa jetkizilgenimen, kóp uzamai qaitys boldy.
2021 jyly Máskeý soty MHQMI stýdenti Tomiris Baisafany óltirdi dep aiyptalǵan Daǵystan úkimetiniń burynǵy basshysy Muhtar Medjidovtyń ulyn aqtap shyqty. Al marqumnyń anasy úkimmen kelispeitinin aityp, apelliatsiiaǵa beretinin málimdedi.
