Máskeý qalasynyń Zamoskvoreche aýdandyq soty Aleksei Navalnyidyń "Rossiia býdýshego" partiiasyn tirkeýden bas tartqan Resei ádilet ministrliginiń sheshimin zańdy dep tanydy. Bul aqparatty "MBH media" tilshisi sot zalynan taratty.
Resei ádilet ministrligi Navalnyidyń saiasi partiiasyn tirkeýden mamyr aiynda besinshi ret bas tartqan edi. Bul sheshimine "Rossiia býdýshego" ataýymen tirkelgen partiia bar degen ýáj aitqan. Oppozitsiiadaǵy saiasatker Navalnyi "mundai ataýmen buryn "Partiia svobodnyh grajdan" atalǵan bilikshil partiia tirkelgenin, partiia ataýy urlanǵanyn" málimdegen.
Seisenbi kúni sotta jemqorlyqpen kúres qorynyń ókili Aleksei Navalnyi men onyń jaqtastaryna saiasi qysym jasalyp otyrǵany jaily aitty. Onyń sózinshe, Navalnyidyń jaqtastary saiasi partiialaryn jeti jyldan beri tirkete almai júr, politsiia Navalnyidyń aimaqtardaǵy shtabtaryn udaiy tintedi, al jemqorlyqpen kúres qoryna "aqshanyń izin jasyrdy" degen aiyppen qylmystyq is qozǵaǵan.
- Aleksei Navalnyidyń partiiasyn tirketý úshin adam quqyǵy boiynsha Eýropa sotyna shaǵymdanýǵa týraly keletin shyǵar, - dedi jemqorlyqpen kúres qorynyń zańgeri.
Navalnyi Reseidegi sailaýlarǵa qatysý úshin 2012 jyldan beri saiasi partiiasyn tirketýge tyrysyp keledi. Odan beri partiia ataýyn "Narodnyi alians", "Partiia progressa" jáne "Partiia býdýshego" dep úsh ret ózgertti. Alaida, Resei ádilet ministrligi árdaiym túrli jeleýmen tirkeýden ótkizýden bas tartyp keledi.
