Máskeý meri Sergei Sobianin qurylystaǵy shetel jumysshylaryn renovatsiia baǵdarlamasy boiynsha "basqa sapadaǵy adamdarmen" almastyrýdy tapsyrdy, dep jazady Azattyq.
"Moskva" agenttigi habarlaǵandai, ol migranttardyń ornyna Reseidiń aimaqtarynan adamdardy tartýdy usynǵan. Biraq statistika boiynsha Reseide jumys kúshi jetkiliksiz.
"Basqa eńbekaqymen, basqa sapadaǵy adamdar kerek. Migranttar bizde onsyz da kóp", - deidi Sobianin.
Máskeý meri bul týraly 17 qarashada qala ortalyǵyndaǵy jańa kóp qabatty úilerdiń qurylysymen tanysyp júrgen kezde aitqan.
Qurylys kompaniiasynyń jetekshisi kásibi jumysshylar bul nysanda 120-150 myń rýbl ailyq alatynyn jetkizdi. Oǵan Sobianin "bul ailyq migranttar úshin emes, máskeýlikter úshin" dep jaýap qaitardy.
1 qarashada qala salý saiasaty jáne qurylys máseleleri boiynsha vitse-mer Andrei Bochkarev Máskeý ákimdigi qurylysta isteitin sheteldik jumysshylardan bas tartýdy josparlap jatqanyn aitqan.
Qyrkúiekte Máskeý biligi qalada 200 myńǵa tarta jumys kúshi jetispeitinin alǵa tartqan. Oǵan deiin Sergei Sobianin eńbek migranttarynyń ketýi infliatsiianyń ósýine áser etip jatqanyn jetkizgen. Ol byltyr koronavirýs shekteýlerine bailanysty qurylystyń kóbi toqtap qalǵanyn da eske salǵan.
Tamyz aiynda Reseide qurylys salasyna 3 mln jumysshy jetispeitini habarlanǵan edi. "Izvestiia" basylymy Reseide qurylys oryndary jumys kúshin tartý boiynsha bir-birimen ǵana emes, Ózbekstan men Qazaqstandaǵy qurylys nysandarymen de básekelesedi dep jazǵan. Osyǵan deiin úkimet qurylys jumystaryna tutqyndardy tartýdy usynǵan.
