Almaty ákimi Baqytjan Saǵyntaev «Almaty» arnasynda ótken tikelei efirde máskeýlik dárigerlerdiń almatylyq áriptesteriniń jumysyn qalai baǵalaǵanyn atap ótti, dep habarlaidy QazAqparat.
«Biz koronavirýspen kúres kezinde Máskeý meriiasyna habarlastyq. Máskeýlik áriptesterimizdi ózara tájiribe almasý maqsatynda shaqyrdyq. Bizdiń usynysymyz jerde qalǵan joq. 25 maman Almatyǵa kelip, 2 aptadai jumys istedi. Olar Almatydaǵy barlyq aýrýhanada aýdit júrgizdi. Reseide sáýir-mamyrda ahýal qiyn bolatyn. Biz ótip jatqan qiyndyqty olar sol ailarda bastan ótkergen bolatyn», - dedi ákim.
Qala ákiminiń aitýynsha, máskeýlik dárigerler eshelondaý tártibi týraly usynym bergen.
«Bastapqy kezde olarda da oryn jetispeýshiligi bolǵan. Olar naýqastardy qabyldaityn aýrýhanalardy eshelonǵa jiktep baryp protsesti turaqtandyrǵan. Máskeýlik áriptesterimiz bizdiń mamandardyń biliktiligin joǵary baǵalady. Almatylyq reanimatolog pen infektsionisterdiń daiyndyǵy óte jaqsy», - dedi qala basshysy.
Baqytjan Saǵyntaev sheteldik áriptestermen bailanys odan ári jalǵasatynyn aitty.
