Ishki ister ministri Erlan Turǵymbaev Zarechnyi túrmesinde bolǵan jaǵdaiǵa qatysty túsinikteme berdi, dep habarlaidy Sputnik Qazaqstan.
"26 shildede áleýmettik jelilerde video taralyp ketti. Onda Almaty oblysynyń Zarechnyi kentindegi túrmede sottalǵandarǵa zorlyq-zombylyq kórsetý faktileri jariialanǵan. Men birden qyzmettik tekseris jiberdim. Koloniiaǵa ishki qaýipsizdik mamandary bardy", - dedi Turǵymbaev.
Ministrdiń aitýynsha, osy ýaqytqa deiin 40 video men aýdio jazba zerdelenip, sottalǵandarǵa zorlyq kórsetý faktileri rastaldy. Keshe tártiptik komissiianyń sheshimimen 14 qyzmetker tártiptik jazaǵa tartyldy. Olardyń ishinde 7-i ishki ister organdarynan shyǵaryldy. Túrmeniń eki orynbasary men mekeme bastyǵy da jumystan bosatyldy.
"Keshe shuǵyl sharalar barysynda mekemeniń 5 qyzmetkeri ustalyp, eki qylmystyq is qozǵaldy. Sol bes adamnyń ishinde túrme bastyǵynyń orynbasary da bar. Tergeý jalǵasýda, eki kúnniń ishinde tiisti shara qabyldanady. Shyny kerek, ondai fakt qylmystyq atqarý júiesi úshin masqara. Biz basqa mekemelerdi de tekseretin bolamyz", - dedi Turǵymbaev.
