Túrkistan oblysynyń Arys qalasynda mas kúiinde kólik júrgizip, aýlada otyrǵan adamdardy qaqqan áielge sot úkimi shyqty. Jol-kólik oqiǵasynan úsh adam, onyń ishinde eki bala qaza taýyp, taǵy eki adam jaraqat alǵan, dep habarlaidy ult.kz.
Oqiǵa biyl 6 maýsymda saǵat 20:30 shamasynda Arys qalasyndaǵy A.Seitbek kóshesinde bolǵan. Sot materialdaryna sáikes, sottalǵan áiel alkogoldik masań kúide kólik júrgizip, úidiń syrtyndaǵy oryndyqta otyrǵan bir top adamdy qaǵyp ketken. Artynsha ol jol-kólik oqiǵasy bolǵan jerden ketip qalǵan.
Áielge Qazaqstan Respýblikasy Qylmystyq kodeksiniń 345-1-babynyń 4-bóligi jáne 347-baby boiynsha aiyp taǵylǵan.
Túrkistan oblysynyń soty oǵan 9 jylǵa bas bostandyǵynan aiyrý jazasyn taǵaiyndady. Sonymen qatar, áiel ómir boiyna kólik júrgizý quqyǵynan aiyryldy.
Alaida sottalǵan áieldiń asyraýynda kámeletke tolmaǵan balasy bolǵandyqtan, bas bostandyǵynan aiyrý jazasyn oryndaý bir jylǵa keiinge qaldyryldy.
Sottalǵan áieldiń mektepte muǵalim bolyp jumys istegeni belgili boldy. 5 qyrkúiekte ótken sot jaryssózinde ol asyraýynda múgedektigi bar balasy bar ekenin aityp, sottan ózine aýyr jaza taǵaiyndamaýdy suraǵan.
Sot úkimi zańdy kúshine engen.
