Foto: QR MAM
Qazaqstandyq opera ánshisi Mariia Mýdriak Qytaida V. Motsarttyń «Figaronyń úilenýi» operasyndaǵy grafinia Almaviva partiiasyn alǵash ret oryndaidy, dep habarlaidy Ult.kz.
Qoiylymdar 15, 17 jáne 19 shilde kúnderi Beijińdegi Ulttyq oryndaýshylyq óner ortalyǵynda ótedi. Al 8–10 tamyz aralyǵynda ánshi Sian qalasyndaǵy Grand Opera House sahnasynda óner kórsetedi.
"Bul – Mariia Mýdriaktyń Qytaiǵa besinshi gastroldik sapary. Buǵan deiin osy operada Siýzannanyń partiiasyn oryndaǵan ánshi biyl alǵash ret grafinia Almavivanyń rólin somdaidy. Bul keiipkerdiń tereń ári qarama-qaishy sezimderi týyndyǵa erekshe dramalyq áser men emotsiialyq tereńdik beredi", - delingen habarlama.
Mariia Mýdriak Qazaqstanda dúniege kelgen. Ol bala kezinen-aq án aitýǵa qyzyǵyp, 10 jasynan bastap Italiiada vokaldan dáris alǵan. Sol jerde La Skala teatrynyń balalar horynda shyǵarmashylyq jolyn bastap, keiin Milandaǵy Dj. Verdi atyndaǵy konservatoriiany támamdady. Qazir ol álemniń jetekshi opera sahnalarynda óner kórsetip júr jáne álemdegi eń úzdik on sopranonyń biri sanalady.
