Belgili otandyq investor Marǵulan Seisembaev álemdik ekonomikada qalyptasqan jaǵdaiǵa bailanysty teńge men dollar ustap otyrǵan azamattarǵa aqshany saqtaýdyń, tiimdi jumsaýdyń joldary týraly óz keńesin usyndy, dep jazady KAZ.NUR.KZ.
Marǵulan Seisembaev óziniń Youtube arnasynda oqyrmandardan jii kelip túsken suraqtarǵa jaýap berdi. Kásipker aldymen qazirgi qarjy-ekonomikalyq jaǵdaidyń kúrdelene túskenine bailanysty ulttyq valiýtanyń qalai qunsyzdanatynyn túsindirdi.
"Eń aldymen ulttyq valiýta ulttyq ekonomikanyń ainasy ekenin este ustaý kerek. Ádette ekonomikadaǵy aqshanyń mólsheri ondaǵy (sol ekonomikadaǵy - red.) óndirilgen taýardyń sanymen teń bolýy kerek. Aqsha - bul óndirilgen barlyq taýardyń quny. Ekonomikada óndiris toqtaǵanda nemese qysqarǵan kezde aqsha sol qalpynda qalsa, ulttyq valiýta qunsyzdanady.
Ulttyq valiýta qunyn joǵaltqanyna qaramastan, úkimet áleýmettik mindettemelermen halyqty qamtamasyz etýi kerek. Sol úshin ulttyq bank aqsha basyp shyǵarýy múmkin, osylaisha zeinetaqy, shákirtaqy jáne biýdjettik qyzmetkerlerdiń jalaqysy siiaqty tólemderdi júzege asyrady. Alaida qunsyzdanýdyń kesirinen halyqtyń tabysy azaiady", - deidi Marǵulan Seisembaev.
Kásipker aqshasyn teńgedei ustaityn azamattarǵa ony naqty qandai qajettilikterge jumsaý keregin atap ótti.
"Birinshiden, ózińizge qajetti taýar qoryn nemese azyq-túlik qoryn jasaqtańyz. Ol aldaǵy 2-3 aiǵa jetkilikti qor bolýy tiis. Qańtardaǵy jaǵdai barlyǵymyzdyń esimizde, besinshi kúni úide bárimiz azyq-túliksiz qaldyq.
Ekinshiden, baǵa qymbattamai turǵanda buzylmaityn taýarlardy satyp alyp qoiyńyz. Ondai taýarlar qataryna qaraqumyq, makaron, konserviler siiaqty taýarlar jatady.
Úshinshiden, ózińizge qatty qajet sheteldiń import taýarlaryn alyp qoiyńyz. Óitkeni dollar quny qarqyndy túrde óse beredi. Gigiena zattary, balalarǵa arnalǵan jórgekter, turmystyq himiia. Osy úsh baǵytta teńgeńizdi jaratýǵa bolady", - deidi Seisembaev.
Kásipker teńgedei aqsha artylyp jatsa, ony shetel valiýtasyna aiyrbastap alýǵa keńes beredi.
"Onyń belgili bir bóligin, aldaǵy eki-úsh aidyń shyǵynyn jaba alatyndai somany bankten alyp, úiińizde saqtańyz", - deidi ol.
Seisembaev elde qandai jaǵdai bolmasyn, azamattardyń tek ózine arqa súieýi kerek ekenin aitady.
