Bizdiń elimizde halyqqa aitylmaityn qupiialar kóp. Ol kóbine qorǵanys, qaýipsizdik salalaryna qatyssyz, laýazymdy tulǵalardyń jyldyq, ailyq tabysy tóńireginde. Birqatar oblys ákimderiniń óz erikterimen jariialaǵan deklaratsiiasy bolmasa jurt Qazaqstan ministrleriniń, Úkimet basshysynyń, Parlament Palatalary Tóraǵalarynyń, Elbasynyń, Joǵarǵy sot Tóraǵasynyń jalaqylary týraly múlde bilmeidi dese bolady. Bári qupiia!
Qarapaiym salyq tóleýshi Siz ben bizdiń qarajatymyzdan quralǵan biýdjetten kún kóretin laýazym ieleriniń jalaqysy nege qupiia bolady? Búkil álemde qupiia bolmaityn nárseler Qazaqstanda da qupiia bolmaýǵa tiis. Memleket basshysynyń kezekti Joldaýynda bilikti halyqqa jaqyndatý maqsatynda laýazym ieleriniń jyl basynda ótken jylǵy ailyq, jyldyq tabystaryn ashyq jariialaýdy mindet etip qoiǵany durys dep oilaimyn. Ekonomikany kótergen nemese tyǵyryqqa tiregen laýazym ieleriniń tabysyn qarapaiym jurtshylyq bilýge tiis.
Búgingidei aqparattar zamanynda biz basqa elderdegi joǵary laýazym ieleriniń ailyq, jyldyq tabysy týraly jaqsy bilemiz. Qazaqstanda da soǵan qol jetkizilýi qajet. Ashyqtyq halyqtyń bilikke degen senimin arttyrady. Qupiialyq bishigeshterdiń jaýapkershiligin tómendetedi, bilik pen halyq arasyndaǵy jikti tereńdetedi. Ashyqtyq - sonyń báriniń emi.
Endi aqparattar kózderinen jinalǵan myna derekterege kóz salyńyz:
BUU Bas hatshysy Pan Gi Mýnnyń jyldyq tabysy 227 253 dollar, ailyq jalaqysy 18 938 dollar.
AQSh Prezidenti Barak Obamanyń bir jylǵy tabysy 395 myń dollar, ailyq jalaqysy 32 917 dollar.
AQSh-tyń 42-shi Prezidenti, BUU-nyń Gaitidegi ókili Bill Klintonnyń jyldyq tabysy 5,3 mln dollar, aiyna kirisi 441 667 dollar.
Germaniia kantsleri Angela Merkeldiń jyldyq tabysy 249 341 dollar, ailyǵy 20 778 dollar.
Frantsiia Prezidenti Fransýa Ollandtyń jyldyq tabysy 202 270 dollar, ailyq jalaqysy 16 856 dollar.
Resei Prezidenti Vladimir Pýtinniń jyldyq tabysy
135 736 dollar, ailyq jalaqysy 11 311 dollar.
Resei Úkimetiniń tóraǵasy Dmitrii Medvedevtiń jyldyq tabysy 135 227 dollar, ailyq kirisi 11 myń dollardan sál asady.
Belarýs Respýblikasynyń Prezidenti Aleksandr Lýkashenkonyń jyldyq tabysy 53 777 dollar, ailyq jalaqysy 4 481 dollar.
Ázerbaijan Prezidenti Ilham Alievtiń jyldyq tabysy
225 000 dollar, ailyq jalaqysy 18 750 dollar.
Al, Qazaqstan basshylyǵynyń ailyq, jyldyq tabystary nege qupiia bolady? Qazaqstan elektoraty basqa elderdiń halqy tárizdi óz biliginiń jeke tabystary týraly bilýge quqyly.
