Aqordada Qazaqstan Respýblikasynyń Memlekettik hatshysy Marat Tájinniń tóraǵalyǵymen «Rýhani jańǵyrý» baǵdarlamasyn iske asyrý jónindegi ulttyq komissiianyń otyrysy ótti, dep habarlaidy "Ult aqparat".
Onda baǵdarlamany iske asyrýdyń eki jarym jyl ishindegi qorytyndylary qaraldy jáne aldaǵy kezeńniń mindetteri talqylandy.
Otyrysty ashqan Memlekettik hatshy Marat Tájin Baǵdarlamanyń barlyq baǵyttary boiynsha aýqymdy jumys júrgizilgenin atap ótti.
Qazaq tili álipbiin latyn grafikasyna kóshirý jumystary Úkimettiń kezeńdik is-sharalar josparyna sáikes jalǵasýda. Orfografiialyq, Ádistemelik, Terminologiialyq jáne Aqparattyq jumys jónindegi 4 top jumys isteidi.
«Jańa gýmanitarlyq bilim» jobasy boiynsha Cambridge University Press, Oxford University Press jáne basqa da iri halyqaralyq baspalarmen yntymaqtasa otyryp, filosofiia, saiasattaný, dúniejúzilik tarih, ekonomika, ádebiet teoriiasy, halyqaralyq quqyq, orientalistika, pedagogika jáne basqa da ǵylymdar boiynsha 48 oqýlyq qazaq tiline aýdarylyp, shyǵaryldy. Bul jumysqa joǵary oqý oryndarynyń bilikti oqytýshylarynan, redaktorlardan, aýdarmashylar men lingvistterden quralǵan 300-den astam maman qatysty. Oqýlyqtar elimizdiń 113 joǵary oqý orynyna jetkizildi jáne oqytýshylar men stýdentterdiń joǵary baǵasyna ie bolýda. Olardyń elektrondyq nusqalary erkin oqý úshin «Qazaqstannyń ashyq ýniversiteti» portalynda ornalastyryldy.
«Týǵan jer» jobasy boiynsha 10 myńnan asa metsenattyń qatysýymen 1800 mádeniet, bilim, sport nysany jańadan salynyp, 1,5 myń nysan qaita qalypqa keltirildi.
«Jahandyq álemdegi zamanaýi qazaqstandyq mádeniet» jobasy boiynsha tarihymyzda tuńǵysh ret Qazaqstandyq poeziia men proza antologiiasy BUU-nyń 6 tiline aýdarylyp, jaryqqa shyǵaryldy, onyń halyqaralyq tanystyrylymy qyrkúiek aiynda bastalady.
«Qazaqstannyń kieli geografiiasy» jobasy boiynsha 28 tarihi nysan qaita qalypqa keltirilip, aýqymdy ǵylymi-zertteý jumysy júrgizildi. «Otyrar» jáne «Tamǵaly» vizit ortalyqtarynyń qurylysy aiaqtalýda. Tarihi-mádeni mura nysandaryn qorǵaý jáne paidalaný týraly zańnamalar jetildirilýde. BBC World News, «Euronews» telearnalarymen yntymaqtastyqta Qazaqstannyń kieli nysandary týraly derekti filmder tsikli túsirildi.
Qazaqstandyq qoǵamdyq damý institýty jáne óńirlerde jobalyq ofister quryldy.
Mádeniet jáne sport ministrligimen mádeniet salasyndaǵy metsenattyqty yntalandyrý jónindegi usynystar daiyndaldy. Bilim jáne ǵylym ministrligi volonterlik qyzmeti úshin stýdentterdi materialdyq yntalandyrýdyń tetikterin ázirledi.
4-6 qyrkúiekte Qazaqstan elordasynda Aziia qalamgerleriniń birinshi Forýmy ótedi, oǵan qyryqqa jýyq eldiń tanymal aqyn-jazýshylary qatysady.
Tamyz aiynyń sońynda «Mýzeidegi tún» jobasy iske qosylady, onda qazaqstandyqtar ár aidyń tórtinshi senbisinde saǵat 21-den 3-ke deiin eldi mekendegi mýzeilerdiń birin tegin aralai alady.
Jańa televiziialyq maýsymda respýblikalyq efirge mádeniettanýshylyq sipattaǵy radio jáne televiziialyq baǵdarlamalar tsikli efirge shyǵady. Halyqty latyn grafikasyndaǵy jańa álipbige oqytýǵa baǵyttalǵan beinerolikter men beine lektsiialar telearnalar efirlerine shyǵarylady, sondai-aq internetke ornalastyrylady. Klassikalyq mýzykany baǵalaýshylardyń súiiktisine ainalǵan «Klassik» radiosynyń taratý aýmaǵyn keńeitý josparlanýda.
2020 jyl Volonterler jyly dep jariialandy. Osyǵan bailanysty Memlekettik hatshy Marat Tájin memlekettik organdarǵa stýdentterdiń qoǵamdyq paidaly qyzmetine qoldaý kórsetý sharalaryn qabyldaýdy jedeldetýdi tapsyrdy.
Otyrysta Prezident Ákimshiligi basshysynyń orynbasary Málik Mýrzalin, Aqparat jáne qoǵamdyq damý ministri Dáýren Abaev, Mádeniet jáne sport ministri Aqtoty Raiymqulova, Bilim jáne ǵylym vitse-ministri Fatima Jaqypova sóz sóiledi.
