Foto: primeminister.kz
Marat Kúldikov QR Tótenshe jaǵdailar vitse-ministri qyzmetinen bosatyldy, - dep habarlaidy "Ult aqparat" Úkimet baspasóz qyzmetine silteme jasap.
"QR Úkimetiniń qaýlysymen Marat Muhametqaliuly Kúldikov bergen ótinishine sáikes QR Tótenshe jaǵdailar vitse-ministri qyzmetinen bosatyldy", - delingen habarlamada.
Marat Kúldikov 1967 jyly Semei oblysynda týǵan. 1994 jyly QR IIM Almaty joǵary tehnikalyq ýchilishesin «órtten qorǵaný tehnikasy jáne ony uiymdastyrý» mamandyǵy boiynsha, 2000 jyly QR TJK Kókshetaý tehnikalyq institýtyn «órt qaýipsizdigi» mamandyǵy boiynsha bitirgen.
Eńbek jolyn 1989 jyly Semei qalasyn kúzetý jónindegi IIB №79 áskerilendirilgen órt sóndirý bólimine baǵynysty órt sóndirýshi bolyp bastaǵan. 1993-2008 jyldary Shyǵys Qazaqstan oblysynyń memlekettik órtke qarsy qyzmet organdarynda orta jáne aǵa basshy quramynyń túrli laýazymdaryn atqarǵan. 2008-2012 j.j. — Shyǵys Qazaqstan oblysynyń Tótenshe jaǵdailar departamentiniń bastyǵynyń orynbasary – Semei qalasynyń Tótenshe jaǵdailar basqarmasynyń bastyǵy.
2012-2014 j.j. — Jambyl oblysynyń Tótenshe jaǵdailar departamentiniń bastyǵy. 2014-2016 j.j. — Batys Qazaqstan oblysynyń Tótenshe jaǵdailar departamentiniń bastyǵy. 2016-2019 j.j. — QR IIM Tótenshe jaǵdailar komiteti tóraǵasynyń orynbasary. 2019 jyldan Tótenshe jaǵdailar komiteti tóraǵasynyń birinshi orynbasary qyzmetin atqardy.
Al 2020 jylǵy 10 qazanda Úkimet qaýlysymen Tótenshe jaǵdailar vitse-ministri qyzmetine taǵaiyndaldy.
Eske sala keteiik, Abai oblysyndaǵy alapat órt kezinde Memleket basshysy jedel shtab otyrysyn ótkizgen bolatyn. Sol jiynda Qasym-Jomart Toqaev Tótenshe jaǵdailar vitse-ministri Marat Kúldikovtiń sózin bólip, ministrlik jumysyn synaǵan edi.
«Men qyzmetinen bosatqan ministr óziniń tikelei qyzmettik mindetin oryndaýǵa nege múldem nemquraily qarady?! 14 adam qaza tapty. Siz osyny túsinesiz be? Men olardyń otbasylarymen kezdestim. Bul azamattar óz otbasynyń perzentteri, otaǵasy bolatyn. Bir otbasynda eki jasar bala jetim qaldy. Adamdardyń artynda nesieleri qaldy. Olar otbasynyń jalǵyz asyraýshysy edi. Órt búkil álemde bolady, biraq ol jaqta tiisti sharalar qabyldanady. Ministr kelmedi, oblys ákimi tym baiaý qozǵaldy, orynbasarlaryn jiberdi. Jumysqa degen osyndai qarym-qatynas bola ma?! Osy jóninde esep berińiz! Naqty suraq – nege qate boljam jasaldy?» - dedi sol kezde Prezident.
