Sot saraptamasy organdary meditsinalyq qyzmetkerlerine ziiandy eńbek jaǵdaiy úshin qosymsha eńbekaqysy kóterildi. Bul týraly halyqqa onlain rejimde esep berý kezdesýinde Ádilet ministri Marat Beketaev aitty, dep habarlaidy "Ult aqparat".
«Bas prokýratýra jáne Ishki ister ministrligimen birlesken buiryq aiasynda Nur-Sultan, Almaty, Shymkent qalalarynda, Qostanai jáne Pavlodar oblystarynda qylmystyq ister boiynsha jekelegen saraptama túrlerin básekelestik ortaǵa berý jónindegi pilottyq joba iske qosyldy. Osylaisha, 3490 saraptama júrgizildi. Pilot oń nátije kórsetti. Saraptama óndiristeriniń merzimi qysqartyldy jáne memlekettik sarapshylarǵa aýyrtpalyq tómendetildi», - dedi ministr.
Onyń aitýynsha, bul baǵyttaǵy jumys saraptama túrleriniń sanyn ulǵaitý jolymen jalǵasatyn bolady.
«Sot saraptama organdarynyń infraqurylymyn jańǵyrtý maqsatynda Nur-Sultan qalasynda sot saraptama institýtynyń úlgilik ǵimaratynyń qurylysy salynýda. Sot saraptamasy organdary meditsinalyq qyzmetkerlerine ziiandy eńbek jaǵdaiy úshin 30-dan 45 paiyzǵa deiin qosymsha eńbek aqysy kóterildi. Áleýmettik jaǵdaidy jaqsartý maqsatynda jalaqy tóleýdiń faktorlyq-baldyq shkala júiesi engizildi», - dedi M. Beketaev.
Onyń sózine qaraǵanda, qazirgi ýaqytta Parlament Májilisiniń depýtaty bastamashylyq etken sot-saraptama qyzmeti máseleleri jónindegi zańnamaǵa túzetýler jobasy Májilistiń qaraýynda. Zań jobasyn qabyldaý sot-saraptama qyzmeti naryǵynda básekelestikti qurýǵa, jeke sot sarapshylary qyzmetiniń ashyqtyǵyn, sapany júieli baqylaýdy qamtamasyz etýge, sondai-aq sot saraptamasy organdarynyń qyzmetin ońtailandyrýǵa múmkindik beredi.
