Almaty oblysy ákiminiń orynbasary Baǵdat Manzorovqa qatysty iske sońǵy núkte qoiylǵan joq. Bul týraly búgin QR Sybailas jemqorlyqqa qarsy is-qimyl agenttigi 1-shi departamentiniń aǵa tergeýshisi Daniiar Begaidarov aitty, dep habarlaidy QazAqparat.
«Ózderińiz de biletindei, 26 qazanda Manzorovqa qatysty qylmysty is Bas prokýratýra tarapynan toqtatylǵan bolatyn. Bas prokýratýranyń bul sheshimine orai biz Bas prokýrordyń orynbasaryna shaǵym túsirgen edik. Alaida, Bas prokýratýra bul shaǵymdy qanaǵattandyrýdan bas tartty. Jaýabyn jaqynda ǵana aldyq. Bul isti tyńǵylyqty alyp qaraityn bolsaq, Manzorovqa qatysty qylmystyq is elimizdiń eki azamatynyń aryzy boiynsha qozǵaldy. Onda Manzorovtyń jemqorlyq qylmys jasaǵany naqty kórsetilgen», - dedi ol.
Onyń atap ótýinshe, Bas prokýratýra Manzorovqa qatysty qylmystyq isti toqtatqannan keiin Sybailas jemqorlyqqa qarsy is-qimyl agenttigine aryz jazǵan eki azamatty jalǵan málimetter bergeni úshin jaýapkershilikke tartý qajet.
«Qazirgi ýaqytta biz Bas prokýratýranyń dálelderin zerdelep jatyrmyz. Atalǵan dálelderdi tyńǵylyqty qarap bolǵannan keiin narazylyq tanytý máselesi qaralady. Iaǵni, Bas prokýrordyń atyna shaǵym túsiremiz», - dedi D.Begaidarov.
Aǵa tergeýshiniń sózine qaraǵanda, Bas prokýror da agenttik shaǵymyn qanaǵattandyrmaǵan jaǵdaida Manzorovtyń ústinen aryz jazǵan eki azamatty jaýapkershilikke tartý máselesi qolǵa alynbaq.
Eske salsaq , Almaty oblysy ákiminiń orynbasary Baǵdat Manzorov ustalǵany týraly buǵan deiin habarlaǵan bolatynbyz.
QR Sybailas jemqorlyqqa qarsy is-qimyl agenttigi oǵan QR Qylmystyq kodeksiniń 190-baby, 2-bóligi, 2-tarmaǵy («Laýazymyn paidalaný arqyly asa iri kólemdegi alaiaqtyq») boiynsha aiyp taqty.
Keiin Bas prokýratýra Baǵdat Manzorovqa qatysty qylmystyq is toqtatylǵanyn resmi túrde málimdedi.
Kóp uzamai sheneýnik óz qyzmetine qaita kiristi.
Óz kezeginde agenttik Bas prokýratýranyń bul sheshimine narazylyq tanytty.
