Qurmanǵazy atyndaǵy Qazaq memlekettik akademiialyq halyq aspaptar orkestri men "Miloserdie" qoǵamdyq qory arasynda qaiyrymdylyq kontsertterin ótkizý týraly memorandým jasaldy. Atalmysh qujatqa DOM direktory Arýjan Sain men Qurmanǵazy orkestriniń direktory Qýanyshbek Muhanǵaliev qol qoidy.
85 jyldyq tarihy bar Qurmanǵazy orkestri osy ýaqytqa deiin túrli qaiyrymdylyq sharalaryna belsene atsalysyp keledi.
Qarttar úiinde, balalar úiinde jáne múgedek jandarǵa arnalǵan uiymdarda talai márte óz ónerin kórsetip júrgen uly orkestr elimizdegi ózge mádeni ujymdardyń arasynda alǵashqylardyń biri bolyp osyndai igi isti bastady.
Qazaqtyń tól ónerin dáriptep júrgen óner ordasy osy joly da muqtaj jandarǵa qol ushyn sozýdy maqsat tutyp, Qazaqstandaǵy bala quqyqtary jónindegi ýákil Arýjan Sainmen birlese jumys istemekshi.
Al "Miloserdie" qoǵamdyq qory (DOM - red.) 2006 jyldyń sáýir aiynda óz jumysyn bastap, búginge deiin aiyqpas dertke shaldyqqan búldirshinderdiń ómiri úshin kúresip keledi.
DOM negizgi úsh baǵyt boiynsha túrli qaiyrymdylyq sharalaryn uiymdastyrady. Solardyń ishinde "Balalarǵa ómir syila" turaqty aktsiiasy aýyr syrqatqa shaldyqqan qazaqstandyq balalardyń emine qarajat jinaýmen ainalysady.
Osy oraida Qurmanǵazy atyndaǵy Qazaq memlekettik akademiialyq halyq aspaptary orkestri men Arýjan Sain bastaǵan qoǵamdyq qor ortaq kelisimge kelip, atalmysh aktsiia boiynsha túrli qaiyrymdylyq sharalaryn jasaý týraly sheshim shyǵardy.
Qos tarap qol qoiǵan memorandým aiasynda ótkiziletin alǵashqy kontsert 23 aqpanǵa josparlanǵan.
Qaiyrymdylyq keshi Almaty qalasyndaǵy Qurmanǵazy orkestriniń kontsert zalynda ótedi dep kútilýde.
