Qaznette SinoVac shyǵarǵan CoronaVac vaktsinasy SARS-CoV-2 koronavirýsynyń omikron nusqasyna qarsy qorǵanysty qamtamasyz etpeidi degen qorytyndy shyǵarylǵan jaqynda júrgizilgen zertteý týraly aqparat taralýda. Bul aqparatta manipýliatsiia belgileri bar. Nege ekenin túsindirip óteiik, dep jazady Stopfake.kz saity.
Aldymen SinoVac óndirgen CoronaVac vaktsinasy DDSU-men maquldaǵanyn jáne álemniń 52 elinde, sonyń ishinde Qazaqstanda da paidalanylatynyn atap ótkenimiz jón. Ekpe Qytai, Chili, Filippin, Túrkiia jáne Tailandta 29 klinikalyq synaqtan ótti. Onyń beseýi birinshi kezeń, 12 – ekinshi, 12 – úshinshi kezeń aiasynda ótkizildi.
CoronaVac – tiimdiligi men qaýipsizdigi ǵylymi dáleldengen inaktivtendirilgen vaktsina. Preparattyń quramy, onyń tolyq sipattamasy jáne janama áserleri týraly aqparatty QR Densaýlyq saqtaý ministrligi Meditsinalyq jáne farmatsevtikalyq baqylaý komitetiniń resmi portalynan tabýǵa bolady.
Qaznet paidalanýshylary jazyp otyrǵan zertteý bul preparattyń paidasyz ekendiginiń belgisi emes. Birinshiden, búgingi kúni ol retsenziiadan ótpegenin atap ótkenimiz jón, bul týraly eńbek mátini jariialanǵan Nature Medicine saity habarlady.
Ekinshiden, zertteýdiń ózi CoronaVac preparatynyń eki dozasymen egilgen adamdar saldyrǵan Pfizer/BioNTech vaktsinasynyń býsterlik dozasynyń tiimdiligin anyqtaýǵa arnalǵan.
Onda býsterlik doza omikron nusqasynan qorǵanys deńgeiin edáýir arttyratyny, sondai-aq «CoronaVac vaktsinasynyń eki dozasyn alǵan qatysýshylarda Omikrondy beitaraptandyrý anyqtalmaǵany» aitylǵan.
Alaida, bul CoronaVac patogenniń osy nusqasyna qarsy múldem paidasyz degenniń belgisi emes. XinhuaNet qytai basylymynyń habarlaýynsha, DDSU sarapshylary bul preparat aýrýdyń aýyr aǵymyn jáne omikron nusqasyn juqtyrǵan kezde aýrýhanaǵa jatqyzýdy boldyrmaýǵa qabiletti dep málimdedi.
Dúniejúzilik densaýlyq saqtaý uiymynyń tótenshe jaǵdailar jónindegi menedjeri Abdi Mahamýdtyń CoronaVac vaktsinasy omikron nusqasyn juqtyrǵan jaǵdaida aýrýdyń aýyr aǵymynyń aldyn alady degen sózderin South China Morning Post basylymy da keltirdi.
Qoryta aitqanda, CoronaVac vaktsinasynyń omikron nusqasynan qorǵaý deńgeii tómen bolǵanymen, indetke shaldyqqan adamdardy aýrýhanaǵa jatqyzýdan jáne ólimnen saqtai alady. Sonymen qatar, bul vaktsinanyń SARS-CoV-2 koronavirýsynyń barlyq basqa mýtatsiialarynan qorǵaýda tiimdiligin joǵary, bul klinikalyq zertteýlerdiń nátijelerimen rastalady.
