Tashkent qalasynda jastar men jasóspirimder arasynda ótken sambodan álem chempionatynda mańǵystaýlyq Dáýren Tólegenov top jardy, dep habarlaidy "Ult aqparat".
Bairaqty básekede mańǵystaýlyq samboshy, «Jas batyr» sport mektebiniń sportshysy Dáýren Tólegenov 56 kg salmaqta qarsylastarynyń bárin tize búktirip, oq boiy ozyp shyqty.
Sportshy Túrikmenstan, Kolýmbiia, Ázirbaijan, Ózbekstan sportshylaryn aiqyn basymdyqpen jeńip, álem chempiony ataǵyn jeńip aldy.
«Dáýren Tólegenov - aitýly dodalarda júlde alyp júrgen, bolashaǵynan zor úmit kúttiretin jas samboshy. 2019 jyly QR chempiony, Aziia chempiony, Álem chempiony atandy. «Jas batyr» sport mektebi ujymynyń qýanyshynda shek joq. Chempion tárbieleýde ter tógip, eńbek etip júrgen barsha bapkerlerdi quttyqtaimyn», - deidi «Jas batyr» sport mektebiniń direktory Manarbek Bisekenov.
