Mańǵystaý oblysynda ónerkásiptik qaldyqtardy qaita óńdeýmen ainalysatyn «Ekoterra» JShS aiyppul máselesi boiynsha Joǵarǵy sotqa júgindi.
Atalǵan kompaniia ókilderiniń málimetinshe, ekologiialyq tekserý qorytyndysy boiynsha kásiporynǵa eshqandai negizsiz 4,1 mlrd teńge somasynda aiyppul salynǵan, dep habarlaidy "Ult aqparat".
«Ótken jyly Mańǵystaý oblysy Ekologiia departamenti bizdiń kásiporynda tekserý júrgizip, onyń qorytyndysy boiynsha aiyppul salyndy. Bir qaraǵanda, bul kezekti tekserý sekildi. Biraq ta bul másele budan buryn bastalǵan bolatyn. Osyǵan deiin mundai tekseris júrgizilgen edi, sol kezde Ekologiia departamenti barlyq tólemder men aiyppuldardy eseptep berdi. Óz kezegimizde sotqa júginip, jergilikti mańǵystaýlyq sot bizdiń ustanymnyń durystyǵyn bekitti. Sottarda biz ózimizdiń quqyǵymyzdy qorǵap shyqtyq», - dedi atalǵan kompaniianyń zańgeri Igor Toshanov.
Taratylǵan málimetke qaraǵanda, 2015 jyly osy tektes talqylaý barysynda QR Joǵarǵy soty «Ekoterra» paidasyna sheshimin shyǵardy. Onyń negizinde «Ekoterra» JShS óndiris qaldyqtaryn qaita óńdeý kezinde qaldyqtardy óńdeýdiń úzdiksiz óndiristik tsiklynda qaldyqtardy ýaqytsha saqtaýdy qamtamasyz etedi. Bul úshin qorshaǵan ortaǵa emissiialarǵa ruqsat alý talap etilmeidi. Sáikesinshe, qorshaǵan ortaǵa emissiialar úshin tólem jasamaýy tiis.
QR ekologiialyq zańnamasy qaldyqtardyń paida bolýyn azaitýǵa baǵyttalǵan jáne olardy qaita óńdeýdi yntalandyrady. Osyǵan bailanysty kásiporynnyń qaldyqtaryn jaiǵastyrý úshin alynatyn ekologiialyq tólemder esebinen qaldyqtar qaita óńdelýi tiis. Iaǵni, kásiporyn qaldyqtardy óńdeitin bolsa, ol qorshaǵan ortaǵa emissiialar úshin tólemderden bosatylady, sebebi ol qaldyqtardy qorshaǵan ortaǵa tastamaidy, kerisinshe óndiriste ekinshi ret paidalanady.
«Joǵarǵy sottyń zańdy sheshimi bar. Alaida 2018 jyly bizdi qaitadan qaldyqtardy ornalastyrǵany úshin jaýapqa tartyp, aiyppuldardy eseptedi. Biz sotqa baryp, osyǵan deiin bizdiń paidamyzǵa tiisti sheshim jasalǵanyn kórsettik. Alaida ony eshkim de nazarǵa almady. Bizdi kináli sanap, emissiia úshin tólem jasaýdy mindettep otyr», - dedi zańger.
Qazirgi ýaqytta «Ekoterra» JShS oblystyń birinshi jáne apelliatsiialyq instantsiialardaǵy sotynyń sheshimi negizinde ákimshilik jaýapqa tartylýda. Oǵan qosa, tekserý aktisi negizinde oblystyń memlekettik kirister organdarynan «Ekoterra» JShS-ge jalpy somasy 4,1 mlrd teńgege qorshaǵan ortaǵa emissiialar úshin aqy somasyn óndirip alý týraly 4 habarlama jiberildi.
Óz kezeginde kompaniia basshylyǵy aitylǵan narazylyqtarmen kelispeitindigin jariialady. Qazirgi ýaqytta «Ekoterra» JShS-in ákimshilik jaýapqa tartý jónindegi Mańǵystaý oblysy sotynyń sheshimine qatysty QR Joǵarǵy sotyna shaǵym jasaldy.
Kompaniianyń teń quryltaishysy Gúljihan Jaqaevanyń atap ótýinshe, búginde kompaniia 4 mlrd teńge aiyppuldy tóleýge qaýqarsyz, osynyń saldary óndiristi bankrotqa alyp kelýi múmkin.
«Kúieýim ekeýimiz kompaniiany ózimiz qurdyq. Bizdiń kásiporynda qaldyqtardy tolyqtai qaita óńdeitin múmkindikter bar. Qazirgi kezde kompaniiada 200 adam qyzmet etýde, olarǵa 150-300 myń teńge somasynda eńbekaqy tólenip keledi. Olardyń barlyǵynda otbasylary, alǵan nesileri bar», - dedi G. Jaqaeva.
Aita keteiik, tekserýler qorytyndysy boiynsha «Ekoterra» JShS 2016 jyldyń qarasha, jeltoqsan ailary jáne 2017 jyly qorshaǵan ortaǵa emissiialarǵa ruqsat berýde belgilengen normativterden qaldyqtardy asyra qaita óńdep, soǵan sáikes jaiǵastyrǵany anyqtaldy.
