Mańǵystaýlyq ekoambassador Ádilbek Qozybaqov Ramsar konventsiiasy Qazaqstan tabiǵatyna qandai paidasyn tigizetinin túsindirdi, dep habarlaidy QazAqparat.
Onyń aitýynsha, 1971 jyldyń 2 aqpanynda Irannyń Ramsar qalasynda negizinen sýda júzetin qustar mekendeitin halyqaralyq mańyzy bar sýly-batpaqty jerler týraly konventsiia nemese Ramsar konventsiiasy qabyldanǵan. Qazaqstanda bul qujat 2007 jyly kúshine endi.
Búgingi tańda Qazaqstanda halyqaralyq mańyzy bar sýly-batpaqty 10 alqap bar, jalpy aýdany - 3 281 398 ga.
«Ortalyq Aziiadaǵy Ramsar konventsiiasynyń qaǵidattaryn ilgeriletý úshin bes el (Qazaqstan, Qyrǵyzstan, Túrkimenstan, Ózbekstan jáne Tájikstan) arasyndaǵy yntymaqtastyq pen ózara is-qimyldy kúsheitý arqyly 2016 jyly Ortalyq Aziianyń Ramsar óńirlik bastamasy quryldy. Úlken aýmaqty ekspress-baǵalaý jumysyna menimen birge Mańǵystaý oblysynyń tabiǵi resýrstar jáne tabiǵat paidalanýdy retteý basqarmasy basshysynyń orynbasary Esenqos Ádilbaev pen Aqtaý qalasynyń himiia-biologiia baǵytyndaǵy Nazarbaev Ziiatkerlik mektebi direktorynyń orynbasary Baqytgúl Jaqsylyqova qatysty. Bizge postkeńestik keńistiktegi eń bedeldi ǵalym-ornitologtardyń biri, professor Eldar Rýstamov baǵa jetpes konsýltatsiialyq kómek kórsetti», – deidi Ádilbek Qozybaqov.
Eske sala keteiik, 3 aqpanda Nur-Sultan qalasynda «Volonterler jyly» aiasynda ekologiialyq qaýymdastyqtar men volonterlerdiń slioti ótti. Mańǵystaýlyq ekovolonter, biolog Ádilbek Qozybaqov Mańǵystaý oblysy boiynsha «resmi ambassador» bolyp sailandy.
Ol ekovolonterlikpen 2004 jyldan beri ainalysady. Sońǵy jyldary ol jergilikti jastardy bioalýandyqty saqtaý jónindegi túrli is-sharalar men jobalarǵa belsendi túrde tartady.
Mysaly, 2016 jyldan bastap jyl saiyn qańtar aiynyń ortasynda Aqtaý mańynda Qarakól kólinde sýda júzetin jáne sý mańyndaǵy qustardyń halyqaralyq qysqy esebin uiymdastyryp júr. Sinhrondy esep qus túrleriniń sanyn obektivti baǵalaýǵa jáne olardy saqtaý boiynsha qajetti sharalardy ýaqtyly qabyldaýǵa múmkindik beredi.
Sondai-aq, ol Qazaqstannyń negizgi orntologiialyq aýmaqtarynyń biri retinde Qarakól kólin sanitarlyq tazalaý boiynsha ekologiialyq aktsiialardy jii uiymdastyrady.
Sondai-aq, ol Mańǵystaý jurtshylyǵyna aqbóken múiizin zańsyz satýǵa qarsy aýqymdy aqparattyq kampaniialardyń bastamashysy jáne uiymdastyrýshysy retinde jáne Ústirt qoryǵyn IýNESKO-nyń dúniejúzilik mura tizimine nominatsiialaýdy qoldaýshy retinde belgili. Bul aktsiialarǵa jalpy alǵanda 3000-nan astam adam qatysty, olar - negizinen oqýshylar men stýdentter.
