Mańǵystaý oblysynda taǵy da qoqiqaz videoǵa túsip qaldy, dep habarlaidy QazAqparat.
Kvadrokoptermen túsirilgen beinejazbany jergilikti bloger Azamat Sársenbaev jariialady.
Onyń aitýynsha, júzdegen qyzǵylt qoqiqaz Mańǵystaýdaǵy Qarakólge kelip qonǵan. Olar qarasha aiynyń ortasyna deiin osynda mekendeýi kerek. Odan keiin Iranǵa qarai ushady.
Eske salsaq, buǵan deiin Nur-Sultan qalasynyń shet jaǵyndaǵy Kishi Taldykólge bir top qoqiqaz ushyp kelgeni habarlanǵan bolatyn.
Eko-belsendi Sáken Dildahmettiń aitýynsha, qustyń bul túri Qazaqstannyń Qyzyl kitabyna engizilgen jáne álemde onyń 10-nan astam túri kezdesedi.
«Qoqiqazdar bizdiń elge Afrika, Túrikmenstan, Aýǵanstan elderinen ushyp keledi. Sáýir aiynda kelip, kún sýytqansha (qyrkúiek, qazan ailaryna deiin) bolady. Qoqiqazdardyń elordaǵa jaqyn jerdegi negizgi mekeni Qorǵaljyn qoryǵy, olarda sonda mekendep, kóbeiedi. Mamandardyń aitýynsha, elimizge jyl saiyn 100 myńǵa jýyq qoqiqaz ushyp keledi eken. Onyń ishinde Aqmola, Qostanai, Jambyl jáne Mańǵystaý oblysynyń aýmaǵyn mekendeidi. Taldykólge kelsek, mamandardyń málimdeýinshe, munda kishi jáne úlken 100-den astam qus mekendeidi. Onyń qatarynda qoqiqaz, aqqý, qaz, úirek, shaǵala, birqazan jáne taǵy basqa qustar bar. Taldykólge kelgen bul qoqiqazdyń biylǵy balapandary. Olar jyly jaqqa ushpas buryn osyndai kól men kólshikterge toqtap, ál jinap, odan ári ushady», - deidi Sáken Dildahmet.
