Mańǵystaý atom-energetikalyq kombinatynyń BN-350 reaktorlyq qondyrǵysyn paidalanýdan shyǵarý jobasy ázirlendi. Bul jaiynda Senat depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
«Búgingi kúni BN-350 reaktorlyq qondyrǵysynyń paidalanylǵan iadrolyq otyny 60 metall beton konteinerge salynyp, burynǵy Semei iadrolyq synaq poligonynyń aýmaǵynda uzaq merzimdi saqtaýǵa ornalastyryldy. 2011 jyldan beri paidalanylǵan iadrolyq otyndy qorǵaý, iadrolyq jáne radiatsiialyq qaýipsizdikti qamtamasyz etý jónindegi jumystar respýblikalyq biýdjet esebinen qarjylandyrylady. Bul rette BN-350 reaktorlyq qondyrǵysynyń ǵimarattary men qurylystaryn qaýipsiz saqtaý maqsatynda «BN-350 reaktorlyq qondyrǵysyn paidalanýdan shyǵarý jobasy» tehnikalyq-ekonomikalyq negizdemesi ázirlendi. Osy negizdemege sáikes 114,8 mlrd teńge (2022-2032 jyldardaǵy baǵa) mólsherinde qarjylandyrý kózdelgen, onyń ishinde qurylys-montajdaý jumystary – 36 077,6 mln teńge, jabdyqtar – 48 583,3 mln teńge, basqalary – 30 118,6 mln teńge», - delingen Úkimet basshysynyń jaýabynda.
Onyń atap ótýinshe, kelesi kezeń reaktor qondyrǵysynyń birinshi kontýryndaǵy suiyq metall natriidi jáne suiyq radioaktivti qaldyqtardy óńdeýdiń tiimdi jáne ońtaily ádisteri men tehnologiialaryn tańdaý bolyp tabylady. Qazirgi ýaqytta Energetika ministrligi Atom energiiasy jónindegi halyqaralyq agenttikpen birlesip, jyldam neitrondy reaktorlardy paidalanýdan shyǵarý kezinde týyndaityn problemalar jáne olardy sheshý joldary boiynsha konsýltatsiialar júrgizýde.
«Halyqaralyq sarapshylardyń pikirin eskere otyryp, tehnologiiany tańdaý qorytyndylary boiynsha zańnamada belgilengen tártippen BN-350 reaktorlyq qondyrǵysyn uzaq merzimdi qaýipsiz saqtaý jaǵdaiyna keltirý jónindegi jumystar júrgiziletin bolady. Naqty jobalar boiynsha jumystardyń túpkilikti quny jobalaý-smetalyq qujattamany ázirleý nátijeleri boiynsha aiqyndalatyn bolady», - dep atap ótedi Álihan Smaiylov.
