Mańǵystaý oblysynyń ekonomika jáne biýdjettik josparlaý basqarmasynyń basshysy Marina Álbekova karantin kezinde saqtyq sharalaryn buzyp, týǵan kúnine orai toi ótkizgeni úshin jazalandy. Bul jóninde Mańǵystaý oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti habarlady.
«Vedomstvo úi aýlasynda jappai is-shara ótkizý faktisin anyqtady. Laýazymdy tulǵa túsinikteme berý úshin departamentke shaqyryldy. Sondai-aq, Ákimshilik quqyq buzý kodeksiniń 425-baby boiynsha ákimshilik jaýapkershilikke tartyldy» delingen baspasóz habarlamasynda.
QR Ákimshilik quqyq buzý kodeksiniń 425-baby 1-bóliginiń sanktsiiasyna sáikes talapty buzǵan laýazymdy tulǵalarǵa 230 AEK nemese 638 940 teńge kóleminde aiyppul salynýy tiis.
Mańǵystaý oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti oblys ákimdigi men memlekettik qyzmet isteri departamentine tiisti hat joldady.
Aita keteiik, búgin áleýmettik jelide Mańǵystaý oblysynyń ekonomika jáne biýdjettik josparlaý basqarmasynyń basshysy Marina Álbekovanyń týǵan kúninen video tarady.
Ázirge sheneýnik buǵan qatysty eshqandai málimdeme jasamady.
